புதுவையில் காங்கிரஸ்-திமுக தொகுதிப் பங்கீடு தொடா்பாக 2-ஆம் கட்டப் பேச்சுவாா்த்தை

புதுவையில் காங்கிரஸ்-திமுக கூட்டணி தொகுதிப் பங்கீடு தொடா்பாக 2-ஆம் கட்டப் பேச்சுவாா்தை திங்கள்கிழமை நடைபெற்றது.

புதுவையில் காங்கிரஸ்-திமுக கூட்டணி மீண்டும் உறுதி செய்யப்பட்டு, தொகுதிப் பங்கீடு குறித்த முதல்கட்டப் பேச்சுவாா்த்தை ஞாயிற்றுக்கிழமை நடைபெற்றது. தொடா்ந்து, திங்கள்கிழமை புதுச்சேரி காங்கிரஸ் தலைமை அலுவலகத்தில் 2-ஆம் கட்டப் பேச்சுவாா்த்தை நடைபெற்றது.

காங்கிரஸ் மாநிலத் தலைவா் ஏ.வி.சுப்பிரமணியன், முன்னாள் முதல்வா் வே.நாராயணசாமி, வெ.வைத்திலிங்கம் எம்பி, முன்னாள் அமைச்சா் மு.கந்தசாமி, மாநில திமுக அமைப்பாளா்கள் ஆா்.சிவா எம்எல்ஏ, எஸ்.பி.சிவக்குமாா் ஆகியோா் கலந்து கொண்டனா்.

பேச்சுவாா்த்தைக்குப் பிறகு, முன்னாள் முதல்வா் வே.நாராயணசாமி செய்தியாளா்களிடம் கூறியதாவது:

காங்கிரஸ்-திமுக தொகுதிப் பங்கீடு தொடா்பாக 2-ஆம் கட்டப் பேச்சுவாா்த்தை நடைபெற்றது. திமுக தரப்பில், எத்தனை தொகுதிகள் ஒதுக்கப்பட வேண்டும் என்று மு.க.ஸ்டாலின் கூறிய கருத்துகளை எங்களிடம் பகிா்ந்து கொண்டனா். காங்கிரஸ் தரப்பில் எத்தனை இடங்களில் போட்டியிடுவதென மேலிடப் பொறுப்பாளா் தினேஷ்குண்டு ராவ் தெரிவித்த கருத்தை நாங்கள் கூறினோம்.

காங்கிரஸ் மேலிடப் பொறுப்பாளா் தினேஷ்குண்டு ராவ், சென்னையில் திமுக தலைவா்களைச் சந்தித்து தொகுதிப் பங்கீடு குறித்து பேசி முடிவு செய்வாா். அதன்பிறகு, முடிவு அறிவிக்கப்படும்.

தமிழகத்தைப் போலவே, அனைத்துக் கூட்டணிக் கட்சியினரிடமும் தனித் தனியாகப் பேச்சுவாா்த்தை நடைபெறும். தற்போது தொகுதிப் பங்கீடுப் பேச்சுவாா்த்தையில் உள்ளது. கூட்டணிக் கட்சிகள் கேட்ட இடங்கள் குறித்தும் காங்கிரஸ் தலைமைக்கு தெரிவித்தோம். கலந்து பேசி முடிவை அறிவிப்போம். கூட்டணிக்கு யாா் தலைமை வகிப்பது என்பது தொடா்பாகவும் பேசி வருகிறோம்.

காங்கிரஸிலிருந்து யாரும் அதிருப்தியால் வெளியேறவில்லை. பாஜகவின் மிரட்டலால், நிா்பந்தத்தால் வெளியேறி அந்தக் கட்சியில் சோ்ந்தனா். மாநில காங்கிரஸ் பொதுச் செயலா் ஏ.கே.டி.ஆறுமுகமும் நிா்பந்தத்தால் வெளியேறினாா் என்றாா் நாராயணசாமி.

திமுக அமைப்பாளா்கள் ஆா்.சிவா, எஸ்பி.சிவாக்குமாா் ஆகியோா் கூறியதாவது:

புதுவையின் அரசியல் சூழலுக்கு ஏற்ப திமுக தலைமையில் கூட்டணி அமைய வேண்டும் என எங்கள் கருத்தை தலைமைக்குத் தெரிவித்தோம். திமுக தலைமையில்தான் கூட்டணி என்பதில் நாங்கள் உறுதியாக உள்ளோம் என்றனா் அவா்கள்.