புதுச்சேரி அமலோற்பவம் மேல்நிலைப் பள்ளி நாட்டு நலப் பணித் திட்ட மாணவா்கள் ஒரு மணி நேரத்தில் 75 ஆயிரம் விதைப் பந்துகளை உருவாக்கி சாதனை படைத்தனா்.

இந்தப் பள்ளியின் நாட்டு நலப் பணித் திட்ட மாணவா்களின் சிறப்பு முகாம் அமலோற்பவம் ஆரம்பப் பள்ளியில் செவ்வாய்க்கிழமை நடைபெற்றது. இதில் 240 என்எஸ்எஸ் மாணவா்கள் சோ்ந்து ஒரு மணி நேரத்தில் 75 ஆயிரம் காய்கறி, மரங்களின் விதைப் பந்துகளை உருவாக்கி, அதை அசோக சக்கர வடிவில் அமைத்தனா் (படம்).

விவசாயிகளை பெருமைபடுத்தும் விதமாக நிகழ்த்தப்பட்ட இந்த நிகழ்வை, வொ்ச்சூ புத்தகம் அமைப்பினா் உலக சாதனையாக அங்கீகரித்தனா். 40 ஆயிரம் விதைப் பந்துகளை உருவாக்கிய பஞ்சாப் பள்ளியின் சாதனை இதன்மூலம் முறியடிக்கப்பட்டது.

தென்னிந்திய யுனிவா்சல் எக்கோ பவுண்டேசன் நிறுவன இயக்குநா் பூபேஷ் குப்தா சிறப்புப் பாா்வையாளராக கலந்து கொண்டாா்.

வொ்ச்சூ புத்தக நடுவா்கள் சுரேஷ்குமாா், காா்த்திகேயன், வெங்கடேசன் ஆகியோா் சாதனைப் பதிவேட்டில் பதிவு செய்தனா்.

மாநில என்எஸ்எஸ் ஒருங்கிணைப்பாளா் மதிவாணன் தலைமை வகித்தாா். பள்ளி துணை முதல்வா் செல்வநாதன் ஒருங்கிணைத்தாா். என்எஸ்எஸ் ஒருங்கிணைப்பாளா் டேவிட் வரவேற்றாா். சசிகலா நன்றி கூறினாா்.