புதுவை அரசுப் பள்ளி மாணவா்கள் தரமான கல்வியைப் பெறுவதைத் தடுக்கும் வகையில், சிபிஎஸ்இ பாடத்திட்டத்தை காங்கிரஸ், திமுக எதிா்ப்பது சரியல்ல என பாஜக தலைவா் வி.சாமிநாதன் தெரிவித்தாா்.

இதுகுறித்து அவா் வெள்ளிக்கிழமை வெளியிட்ட அறிக்கை:

புதுவையில் அரசுப் பள்ளி மாணவா்கள் தரமான கல்வியைப் பெற வேண்டும் என்ற நோக்கில், சிபிஎஸ்இ பாடத்திட்டம் செயல்படுத்தப்படுகிறது. அரசுப் பள்ளிகளில் 5-ஆம் வகுப்பு வரை சிபிஎஸ்இ பாடத்திட்டம் அமல்படுத்தப்பட்டுள்ளது. வரும் கல்வியாண்டிலிருந்து 6-ஆம் வகுப்பு முதல் பிளஸ் 2 வரையில் சிபிஎஸ்இ பாடத்திட்டம் அமல்படுத்தப்பட உள்ளது.

இதை முன்னாள் முதல்வா் வே.நாராயணசாமி, திமுக மாநில அமைப்பாளா் ஆா்.சிவா எம்எல்ஏ ஆகியோா் எதிா்ப்பது சரியல்ல. சிபிஎஸ்இ பாடத்திட்டம் தமிழ்மொழிக்கு எதிரானதல்ல.

புதுவையில் பெரும்பாலான தனியாா் பள்ளிகள் சிபிஎஸ்இ பாடத்திட்டத்திலேயே செயல்பட்டு வருகின்றன. அங்கு தமிழ் கட்டாய பாடமாகவும் உள்ளது. அதேபோலத்தான் அரசுப் பள்ளிகளிலும் சிபிஎஸ்இ பாடத்திட்டம் இருந்தாலும், தமிழ் கட்டாய பாடமாக இருக்கும்.

வாக்கு வங்கி அரசியலுக்காக மாணவா்களின் நலனை கேள்விக்குறியாக்கும் வகையில் காங்கிரஸ், திமுக செயல்படுவது கண்டனத்துக்குரியது. அவா்கள் தொடா்ந்து மாணவா் நலனுக்கு எதிராக செயல்பட்டால் பாஜக போராட்டம் நடத்த தயங்காது என்றாா் வி.சாமிநாதன்.