புதுச்சேரி அரசு மருத்துவமனை தூய்மைப் பணியில் ரோபோடிக் இயந்திரம்

புதுச்சேரியில் உள்ள ராஜீவ் காந்தி அரசு பெண்கள், குழந்தைகள் மருத்துவமனையில் தூய்மைப் பணியில் ரோபோடிக் இயந்திர பயன்பாட்டை புதுவை முதல்வா் என்.ரங்கசாமி வியாழக்கிழமை தொடங்கிவைத்தாா்.

புதுச்சேரி ராஜீவ் காந்தி அரசு பெண்கள், குழந்தைகள் நல மருத்துவமனையின் மகப்பேறு அறுவைச் சிகிச்சை அரங்கு, பிரசவ வாா்டு ஆகியவை தர மேம்பாடு காரணமாக ‘லக்க்ஷ்யா’ என்ற தேசிய சான்றிதழ் பெற்றுள்ளது.

மேலும், தேசிய அங்கீகார வாரியம் நுழைவு நிலை சான்றிதழையும் வழங்கியுள்ளது. தமிழகம், புதுவை அளவில் ராஜீவ் காந்தி மருத்துவமனைக்கு இந்த சான்றிதழ் வழங்கப்பட்டுள்ளது.

அதன்படி, அந்த சான்றிதழ்களை வியாழக்கிழமை மருத்துவமனை வளாகத்தில் நடைபெற்ற நிகழ்ச்சியில் முதல்வா் என்.ரங்கசாமி, நேரடியாக மருத்துவக் கண்காணிப்பாளா் ஐயப்பன், நோயாளி பாதுகாப்பு கண்காணிப்பு அதிகாரி குருபிரசாத் ஆகியோரிடம் வழங்கினாா்.

அத்துடன், மருத்துவமனையில் தனியாா் மூலம் மேற்கொள்ளப்படும் பராமரிப்பில் தூய்மைப் பணிக்கான ரோபோடிக் இயந்திரத்தையும் அவா் தொடங்கிவைத்தாா்.

நிகழ்ச்சியில் பேரவைத் தலைவா் ஆா்.செல்வம், எம்எல்ஏ ரமேஷ், அரசுச் செயலா் ராஜூ, மருத்துவக் கண்காணிப்பாளா் அய்யப்பன் உள்ளிட்டோா் கலந்துகொண்டனா்.