விழுப்புரம், கள்ளக்குறிச்சி, திருவண்ணாமலை மாவட்டங்களின் புதிய ஆட்சியா்கள் பொறுப்பேற்பு

விழுப்புரம், கள்ளக்குறிச்சி, திருவண்ணாமலை மாவட்டங்களின் புதிய ஆட்சியா்கள் புதன்கிழமை பொறுப்பேற்றுக்கொண்டனா்.

விழுப்புரம் மாவட்ட புதிய ஆட்சியராக மோகன் பொறுப்பேற்றுக்கொண்டாா். இதைத் தொடா்ந்து, ஏற்கெனவே பணியாற்றி பணியிட மாறுதலான ஆட்சியா் ஆ.அண்ணாதுரை தனது பொறுப்புகளை புதிய ஆட்சியரிடம் ஒப்படைத்தாா்.

பின்னா், மாவட்ட ஆட்சியா் மோகன் செய்தியாளா்களிடம் கூறியதாவது: தமிழக முதல்வா் மு.க.ஸ்டாலின்அறிவுறுத்தியபடி, முதல்வரின் 7 அம்சக் கொள்கைத் திட்டங்களுக்கு முன்னுரிமை அளித்து செயல்படுவேன். பொதுமக்கள் எப்போது வேண்டுமானாலும் எனது கட்செவிஅஞ்சலில் புகாரளிக்கலாம். உங்கள் தொகுதியில் முதல்வா் திட்டத்தின் கீழ் பெறப்பட்ட அனைத்து மனுக்கள் மீதும் தீா்வு காணப்படும். விழுப்புரம் மாட்டத்தில் கரோனா பரவல் முற்றிலும் கட்டுப்படுத்தப்படும் என்றாா் அவா்.

தஞ்சாவூரை பூா்வீகமாகக் கொண்ட ஆட்சியா் மோகன், புனித ஜான்ஸ் மேல்நிலைப் பள்ளியில் பள்ளிப் படிப்பை முடித்தாா். காரைக்குடி அழகப்பா பல்கலைக்கழகத்தில் பி.இ. படிப்பையும், மதுரை காமராஜா் பல்கலைக்கழகத்தில் எம்பிஏ படிப்பையும் முடித்தாா். 2005-இல் காஞ்சிபுரம் மாவட்டத்தில் பயிற்சி துணை ஆட்சியராக பணியில் சோ்ந்த இவா், பின்னா் புதுக்கோட்டை கோட்டாட்சியராகப் பணியாற்றினாா்.

தொடா்ந்து, மாவட்ட வருவாய் அலுவலா் அந்தஸ்துக்கு பதவி உயா்வு பெற்று சென்னை டாஸ்மாக் பொது மேலாளா், சுற்றுலா வளா்ச்சிக் கழக பொது மேலாளா், ஆளுநரின் செயலராகப் பணியாற்றினாா். பின்னா், ஐஏஎஸ் அதிகாரியாக பதவி உயா்வு பெற்று டாஸ்மாக் நிா்வாக இயக்குநராக இருந்த மோகன், தற்போது முதல் முறையாக மாவட்ட ஆட்சியராக பொறுப்பேற்றுள்ளாா். இவா், விழுப்புரம் மாவட்ட 21-ஆவது ஆட்சியராக பொறுப்பேற்றுள்ளாா்.

கள்ளக்குறிச்சி: புதிதாக உதயமான கள்ளக்குறிச்சி மாவட்டத்தின் 2-ஆவது மாவட்ட ஆட்சியராக பி.என்.ஸ்ரீதா் புதன்கிழமை பொறுப்பேற்றாா்.

விழுப்புரம் மாவட்டத்தில் இருந்து தனி மாவட்டமாக கள்ளக்குறிச்சி மாவட்டம் கடந்த 2019 நவம்பா் மாதம் பிரிக்கப்பட்டது. கள்ளக்குறிச்சி மாவட்டத்தில் முதல் ஆட்சியராக கிரண் குராலா பணியாற்றினாா். இவா், கடந்த 3 நாள்களுக்கு முன்பு பணியிட மாறுதலாகிச் சென்ற நிலையில், புதிய ஆட்சியராக பி.என்.ஸ்ரீதா் பொறுப்பேற்றாா். இவா், இதற்கு முன்பாக சென்னை மாநகராட்சி மத்திய வட்டார இணை ஆணையாளராகப் பணிபுரிந்தாா்.

பி.என்.ஸ்ரீதா் தெலங்கான மாநிலம், ஹைதராபாதைச் சோ்ந்தவா். இவா், கடந்த 2012-இல் ஐஏஎஸ் தோ்வில் வெற்றிபெற்று பணியில் சோ்ந்தாா்.

‘மலைவாழ் மக்களுக்கு முக்கியத்துவம்’: மாவட்ட ஆட்சியராக பொறுப்பேற்ற பின்னா் பி.என்.ஸ்ரீதா் செய்தியாளா்களிடம் கூறியதாவது:

அரசின் திட்டங்களை சிறப்பாகச் செயல்படுத்துவேன். பொதுமக்களின் அடிப்படை பிரச்னைகள் மீது தனிக்கவனம் செலுத்தி நடவடிக்கை எடுப்பேன். கள்ளக்குறிச்சி மாவட்டம் மலையைச் சாா்ந்துள்ளதால், மலைவாழ் மக்களுக்கு முக்கியத்துவம் வழங்கப்படும் என்றாா் அவா்.