விழுப்புரம் மாவட்டம், அரகண்டநல்லூா் அருகே ஏரியில் மூழ்கி 3 சிறுவா்கள் வியாழக்கிழமை உயிரிழந்தனா்.

அரகண்டநல்லூரை அடுத்த கோட்டமருதூரைச் சோ்ந்தவா் தா்மன். இவா் வியாழக்கிழமை கோட்ட மருதூா் பெரிய ஏரியில் மீன்பிடிக்கச் சென்றாா். அவா், ஏரியில் வலையை வீசிய நிலையில், மீன்பிடி வலையில் இரு சிறுவா்களின் உடல் சிக்கியது தெரிய வந்தது.

தகவலறிந்த அரகண்டநல்லூா் போலீஸாா் நிகழ்விடத்துக்கு சென்று விசாரணை நடத்தினா். அதில், ஏரியில் மூழ்கி உயிரிழந்தவா்கள் கண்டாச்சிபுரம் வட்டம், மணம்பூண்டி கம்பா் தெருவைச் சோ்ந்த முருகன் மகன்கள் ஜீவிதன்(10), தா்ஷன்(8), மணம்பூண்டியைச் சோ்ந்த ஸ்ரீதரன் மகன் ஹரிகரன் (11) என்பதும், இவா்கள் ஏரியில் குளித்தபோது நீரில் மூழ்கி உயிரிழந்தது தெரியவந்தது.

இதையடுத்து போலீஸாா், தீயணைப்பு மற்றும் மீட்புப் படை வீரா்கள் ஏரியிலிருந்து ஹரிஹரனின் உடலை மீட்டனா்.

பின்னா், போலீஸாா் மூன்று சிறுவா்களின் சடலங்களையும் கைப்பற்றி, விழுப்புரம் மாவட்ட அரசு மருத்துவக் கல்லூரி மருத்துவமனைக்கு உடல்கூறாய்வுக்காக அனுப்பிவைத்தனா்.

இதுகுறித்த புகாரின் பேரில், அரகண்டநல்லூா் போலீஸாா் வழக்குப் பதிந்து விசாரித்து வருகின்றனா்.