சென்னை: தற்போது பிரசாரம் செய்ய வர முடியாத ஊர்களுக்கு வெற்றி மகிழ்வில் பங்கு கொள்ள நான் நிச்சயமாக நேரில் வருகை தருவேன் என கருணாநிதி உறுதியளித்துள்ளார்.

திமுக தலைவர் கருணாநிதி மே மாதம் 3 ஆம் தேதி  ஸ்ரீவில்லிபுத்தூர், அருப்புக்கோட்டை பகுதிகளில் வேன் மூலமும் மாலையில் மதுரையிலும் பிரசாரம் செய்வார் என அறிவிக்கப்பட்டிருந்தது.

தற்போது கருணாநிதியின் பயணத் திட்டம் முழுவதும் மாற்றியமைக்கப்பட்டுள்ளது. வேன் மூலம் பிரசாரம் செய்வது அடியோடு தவிர்க்கப்பட்டுள்ளது.

மே மாதம் 3 ஆம் தேதி மதுரையிலும், 5 ஆம் தேதி சென்னையிலும், 8 ஆம் தேதி சென்னை தங்கச்சாலை மணிகூண்டு பகுதியிலும், 14 ஆம் தேதி சேப்பாக்கத்திலும் நடைபெறும் பொதுக்கூட்டங்களில் கருணாநிதி பேசுகிறார் . இதுதவிர தான்போட்டியிடும் திருவாரூர் தொகுதியில் 11 ஆம் தேதி பிரசாரம் செய்திறார்.

பிரசாரப் பயணத்திட்டம் மாறுதல் தொடர்பாக கருணாநிதி வெளியிட்டுள்ள அறிக்கையில்,

முதலில் வெளியிடப்பட்ட சுற்றுப் பயண நிகழ்ச்சிகளில் விடுபட்டுப் போன மாவட்டங்களின் கழகச் செயலாளர்கள் சிலர், தங்கள் மாவட்டங்களில் பிரச்சாரப் பயணம் வேண்டும் என்று வற்புறுத்திக் கேட்டுக் கொண்டிருந்த நிலையில், முதலில் வெளியிடப்பட்ட நிகழ்ச்சிகளிலேயே ஒரு சில மாவட்டங்கள் தற்போது விடப்பட்டுள்ளன.

காரணம் என்னுடைய முதல் கட்ட ஆறு நாள் தொடர்ச்சியான சுற்றுப் பயண நிகழ்வுகளின் அனுபவம் தான். கழகப் பொருளாளர்  மு.க.ஸ்டாலின் தனது சுற்றுப் பயணத்தை மேலும் விரிவு படுத்திக்கொள்வதாகவும், நான் அதிகம் சிரமப்படக் கூடாது என்றும் கேட்டுக் கொண்டார்.

வரவிருக்கின்ற பொதுத் தேர்தலில் கழகக் கூட்டணி வெற்றி பெற்ற பின்னர், தற்போது விடுபட்ட ஊர்களுக்கு உங்களுடைய வெற்றி மகிழ்வில் பங்கு கொள்ள நான் நிச்சயமாக நேரில்  வருகை தருவேன் என்ற உறுதியினைத் தருகிறேன் என குறிப்பிட்டுள்ளார்.