ஆகஸ்ட் 24 அன்று அஜித் நடிப்பில் உருவாகியுள்ள விவேகம் படம் வெளிவரவுள்ளது. இதையடுத்து தமிழ்த் திரையுலகமும் அஜித் ரசிகர்களும் பரபரப்புடன் படத்தின் முடிவை அறிய ஆவலாக உள்ளார்கள்.

சென்னையைத் தவிர இதர பகுதிகளுக்கான இப்படத்தின் முன்பதிவு தொடங்கப்பட்டுள்ளது. சென்னையில் தேவி, அண்ணா போன்ற திரையரங்குகளின் முன்பதிவு தொடங்கியுள்ளது. ரசிகர்களின் வருகை முதல் நான்கு நாள்களில் கிட்டத்தட்ட நூறு சதவிகிதமாக இருக்கும் என எதிர்பார்க்கப்படுகிறது. இதுவரையிலான அஜித் படங்களின் தொடக்க வசூலை விவேகம் படம் நிச்சயம் முறியடிக்கும் எனக் கணிக்கப்படுகிறது.

பெரும்பாலான மல்டிபிளெக்ஸ்களில் உள்ள அனைத்து திரையரங்குகளிலும் விவேகம் படம் திரையிடப்பட உள்ளதால் இதன் முதல் நான்கு நாள் வசூல் விவரங்களை அறிந்துகொள்ள தமிழ்த் திரையுலகம் மிகவும் ஆவலாக உள்ளது.

ஆகஸ்ட் 24 முதல் முதல் நான்கு நாள்களுக்குத் திரையரங்குகள் திருவிழா போல காட்சியளிக்கக் கூடும். ஜிஎஸ்டி வரி தொடர்புடைய பிரச்னைகளால் சிறிது காலம் முடங்கிப் போயிருந்த தமிழ்த் திரையுலகுக்கு விவேகம் படம் மறுமலர்ச்சியை ஏற்படுத்தித் தரும் என்று எதிர்பார்க்கப்படுகிறது.

சிவா இயக்கத்தில் அஜித் நடிப்பில் உருவாகியுள்ள படம் - விவேகம். இப்படத்தில் காஜல் அகர்வால், அக்‌ஷரா ஹாசன், விவேக் ஓபராய் உள்ளிட்ட பலர் நடித்துள்ளார்கள். வில்லன் வேடத்தில் பாலிவுட் நடிகர் விவேக் ஓப்ராய் நடித்துள்ளார். இது அவர் நடிக்கும் முதல் தமிழ்ப் படம். இந்தப் படத்தை சத்யஜோதி ஃபிலிம்ஸ் தயாரித்துள்ளது. இசை - அனிருத். விவேகம் படம் தணிக்கையில் யு/ஏ சான்றிதழ் பெற்றுள்ளது.