விஜய் சேதுபதி - மாதவன் இணைந்து புஷ்கர் காயத்ரி இயக்கத்தில் நடித்துள்ள விக்ரம் வேதா படத்தை சசிகாந்தின் ஒய்நாட் ஸ்டூடியோஸ் தயாரித்துள்ளது. ஷ்ரதா ஸ்ரீநாத், வரலட்சுமி ஆகியோர் கதாநாயகிகளாக நடித்துள்ளார்கள். இசை - சாம் சி.எஸ். ஆக்ஷன் த்ரில்லர் வகையில் இப்படம் அமைந்துள்ளது.
நேற்று வெளியான இந்தப் படத்தைப் பார்த்த இயக்குநர் சுசீந்திரன், விஜய் சேதுபதியைப் பாராட்டி ட்விட்டரில் பதிவு எழுதியுள்ளார். அதில் அவர் கூறியதாவது:
நேற்று இரவு 'விக்ரம் வேதா' திரைப்படத்தைக் குடும்பத்தினருடன் திரையரங்கில் பார்த்தேன். இப்படத்தின் இயக்குநர்கள் புஷ்கர் - காயத்ரி இருவருக்கும் எனது வாழ்த்துகள். கதை சொன்ன விதமும் நடிகர்களைக் கையாண்ட விதமும் மிகவும் நேர்த்தியாக இருந்தது.
மாதவன், விஜய் சேதுபதி இருவரும் நடிப்பில் அசால்டு பண்ணி இருக்காங்க. (நீ நம்பின கடவுள் உன்னை கைவிட்டாலும், உன் உழைப்பு உன்னை கைவிடாது என்பதற்கு விஜய் சேதுபதி ஓர் உதாரணம்..)
இன்றைய தலைமுறை நடிகர்களில் என்னை நடிப்பில் வியக்க வைத்த இரண்டாவது நடிகர் விஜய்சேதுபதி. இப்படத்தில் பணியாற்றிய நடிகர்கள் மற்றும் தொழில்நுட்பக் கலைஞர்கள் அனைவருக்கும் எனது வாழ்த்துகள் என்று கூறியுள்ளார்.
இதையடுத்து நடிப்பில் தன்னை வியக்க வைத்த மற்றொரு நடிகர் தனுஷ் என்றும் அவர் குறிப்பிட்டுள்ளார்.