திமுக தலைவர் கருணாநிதியின் உடல் நலம் தொடர்பாக நடிகர் சிவகார்த்திகேயன் நலம் விசாரித்தார்.

ரத்த அழுத்தம் குறைந்ததன் காரணமாக வெள்ளிக்கிழமை நள்ளிரவுக்குப் பிறகு காவேரி மருத்துவமனையில் அனுமதிக்கப்பட்ட கருணாநிதிக்குத் தொடர் சிகிச்சை அளிக்கப்பட்டு வருகிறது.  நேற்று, கருணாநிதியின் உடல் நலம் தொடர்பாக நடிகர்கள் விஜய், அஜித், கவுண்டமனி ஆகியோர் ஸ்டாலினிடம் நலம் விசாரித்தார்கள்.

மருத்துவமனைக்கு நேற்று காலை 10 மணிக்கு விஜய் வந்தார். மு.க.ஸ்டாலினை சந்தித்து நலம் விசாரித்துச் சென்றார். நடிகர் அஜித் இரவு 8.40 மணியளவில் மருத்துவமனைக்கு வந்தார். மு.க.ஸ்டாலினைச் சந்தித்து நலம் விசாரித்தார். அப்போது உதயநிதி ஸ்டாலின் உடன் இருந்தார். நடிகர்கள் கவுண்டமணி, விவேக் உள்பட ஏராளமானோர் மருத்துவமனையில் நலம் விசாரித்தனர்.

இந்நிலையில் காவேரி மருத்துவமனைக்கு இன்று வந்த நடிகர் சிவகார்த்திகேயன்,  ஸ்டாலின் மற்றும் கனிமொழி ஆகியோரைச் சந்தித்து நலம் விசாரித்தார். 

கல்லீரல் மற்றும் ரத்தத்தில் ஏற்பட்டுள்ள பாதிப்புகளை சீர் செய்வதற்காக மருத்துவமனையில் மேலும் சில நாள்கள் கருணாநிதி சிகிச்சை பெற வேண்டிய அவசியம் ஏற்பட்டுள்ளதாக காவேரி மருத்துவமனை செவ்வாய்க்கிழமை தெரிவித்தது.  தீவிர சிகிச்சைப் பிரிவில் உள்ள கருணாநிதிக்கு மருத்துவர்கள் தொடர் சிகிச்சை அளித்து வருகிறார்கள். இதில், அவரின் உடல் நிலை சீராக இருப்பதாக மருத்துவர்கள் தெரிவித்தனர்.