ராமின் பேரன்பு திரைப்படத்தின் முதல் டீசர் ஞாயிற்றுக்கிழமை வெளியாகியுள்ளது.
கற்றது தமிழ், தங்க மீன்கள், தரமணி என படத்துக்குப் படம் தமிழ் ரசிகர்களின் பரவலான பாராட்டுகளைப் பெற்று வருபவர் இயக்குநர் ராம். இவரின் அடுத்தப் படைப்பாக உருவாகியுள்ள பேரன்பு வெளிவருவதற்கு முன்பே பலத்த எதிர்பார்ப்பை உருவாக்கியுள்ளது. படப்பிடிப்பு முடிந்துள்ள நிலையில், படம் சர்வதேச திரைப்பட விழாக்களுக்கு அனுப்பப்பட்டு பாராட்டுக்களை பெற்று வருகிறது.
இந்தப் படத்தில் மம்மூட்டி, சரத்குமார், அஞ்சலி, சமுத்திரக்கனி உள்ளிட்டோர் நடித்துள்ளார்கள். தங்க மீன்கள் படப் புகழ் பேபி சாதனா மம்மூட்டியின் மகளாக நடித்துள்ளார். யுவன் இசையமைத்துள்ள இந்தப் படம் ஆகஸ்ட் மாதத்தில் திரைக்கு வரும் என எதிர்பார்க்கப்படுகிறது. நா. முத்துக்குமாரின் மறைவால் தற்போது ராம் - யுவன் - வைரமுத்து என்கிற புதிய கூட்டணி இந்தப் படத்தில் உருவாகியுள்ளது. வைரமுத்துவுடன் கருணாகரன், சுமதி ராமும் இந்தப் படத்தில் பாடல்கள் எழுதியுள்ளார்கள்.
படத்தின் பாடல்களும் டீசரும் ஜூலை 15 அன்று வெளியிடப்படும் என்று படத்தின் முதல் தோற்ற வெளியீட்டின் போது படக்குழுவினர் அறிவித்தனர். அதன்படி, இந்த படத்தின் முதல் டீசர் ஞாயிற்றுக்கிழமை வெளியானது.
அடுத்த ஞாயிற்றுக்கிழமை பேரன்பின் அடுத்த டீசர் வெளியாகும் என்று இந்த டீசரில் குறிப்பிடப்பட்டுள்ளது.