சார்லி சாப்ளின் 2 படத்தில் டூயட்: அசத்தும் செந்தில் & ராஜலட்சுமி! 

2002-ல் வெளியான சார்லி சாப்ளின் படத்தின் இரண்டாம் பாகத்தை இயக்குநர் சக்தி சிதம்பரம் இயக்கி வருகிறார். பிரபுதேவா, நிக்கி கல்ராணி, செந்தில், பிரபு போன்றோர் இதில் நடிக்கிறார்கள்.

விஜய் தொலைக்காட்சியில் கடந்த சில மாதங்களாக ஒளிபரப்பான சூப்பர் சிங்கர் நிகழ்ச்சியின் இறுதிச்சுற்று சமீபத்தில் நடைபெற்றது. இதில் மக்களின் பேராதரவுடன் வெற்றி பெற்றார் நாட்டுப்புறக் கலைஞரான செந்தில் கணேஷ். இதையடுத்து ஏற்கெனவே வாக்குறுதி அளித்தபடி ஏ.ஆர். ரஹ்மான் இசையில் செந்தில் கணேஷ் பாடவுள்ளார். அதற்கு முன்பு, சிவகார்த்திகேயன் நடிப்பில் பொன்ராம் இயக்கத்தில் உருவாகி வரும் சீமராஜா படத்தில் ஒரு பாடல் பாடி திரையுலகுக்கு அறிமுகமாகியுள்ளார் செந்தில் கணேஷ். இதுகுறித்த அதிகாரபூர்வமான அறிவிப்பை இசையமைப்பாளர் இமான் வெளியிட்டுள்ளார். யுகபாரதி எழுதியுள்ள பாடலை செந்தில் கணேஷ் பாடியுள்ளதாக இமான் அறிவித்துள்ளார்.

சூப்பர் சிங்கர் போட்டியில் கலந்துகொண்ட செந்திலின் மனைவி ராஜலட்சுமியால் இறுதிச்சுற்றுக்குத் தகுதி பெறமுடியவில்லை. எனினும் அவர் தற்போது திரைப்படப் பின்னணிப் பாடகியாகியுள்ளார். 

சார்லி சாப்ளின் 2  படத்தில் சின்ன மச்சான் செவத்த மச்சான் என்கிற அவர்களுடைய பாடலையே படத்திலும் பாடியுள்ளார்கள். அம்ரிஷ் இந்தப் படத்துக்கு இசையமைத்துள்ளார். சமீபத்தில் இந்தப் பாடலின் படப்பிடிப்பு பொள்ளாச்சியில் நடைபெற்றுள்ளது.