2017-ம் ஆண்டு விஜய் டிவியில் ஒளிபரப்பான நிகழ்ச்சி ‘பிக் பாஸ்’. பிக் பாஸ் வீட்டில் நூறு நாட்கள் தங்கி வெளியுலகத் தொடர்பில்லாமல் இருப்பதும் பிக் பாஸ் சொல்லும் பணிகளை செய்து முடிப்பதும்தான் இந்த நிகழ்ச்சியில் பங்கேற்றவர்களின் இலக்கு. கணேஷ் வெங்கட்ராம், சக்தி, சினேகன், ஆரவ், ஓவியா, பிந்து மாதவி, ஜூலி, காயத்ரி ரகுராம், உள்பட மொத்தம் 19 பேர் இந்த நிகழ்ச்சியில் போட்டியிட்டனர். 100 நாட்கள் முடிந்த நிலையில் ஆரவ் வெற்றி பெற்றார். ஒவ்வொரு வார இறுதியிலும் நடிகர் கமல்ஹாசன் தொகுத்து வழங்கியதால் இந்நிகழ்ச்சி அதிக கவனம் பெற்றது. இந்த ஆண்டு ‘மக்கள் நீதி மய்யம்’ கட்சியைத் தொடங்கியுள்ள கமல்ஹாசன், தற்போது அதை பலப்படுத்தும் முயற்சியில் உள்ளார்.  

பிக் பாஸ் நிகழ்ச்சிக்கு மக்களிடையே கிடைத்த ஆதரவைத் தொடர்ந்து இதன் இரண்டாவது சீஸன் ஜூன் 22-ம் தேதி முதல் தொடங்கவிருப்பதாக தகவல்கள் வந்துள்ளன. இந்த நிகழ்ச்சியையும் கமல்ஹாசனே தொகுத்து வழங்கவிருக்கிறார் என்பதும் குறிப்பிடத்தக்கது.