ஹிந்தி பிக் பாஸ் 13 தொலைக்காட்சி நிகழ்ச்சி சமீபத்தில் தொடங்கியது. இந்த வருட நிகழ்ச்சியையும் பிரபல பாலிவுட் நடிகர் சல்மான் கான் தொகுத்து வழங்கி வருகிறார். 

இந்நிலையில் பிக் பாஸின் ஒருநாள் நிகழ்ச்சியைத் தொகுத்து வழங்க சல்மான் கானுக்கு ரூ. 8.5 கோடி சம்பளம் வழங்கப்படுவதாகப் புதிய தகவல்கள் வெளியாகியுள்ளன. இதற்கு முன்பு அவருக்கு ஒருநாள் நிகழ்ச்சிக்கு ரூ. 6.5 கோடி வழங்கப்பட்டதாகவும் தற்போது அவருக்கு ஊதிய உயர்வு அளிக்கப்பட்டு ஒருநாள் நிகழ்ச்சிக்கு ரூ. 8.5 கோடி வழங்கப்படுவதாகவும் செய்திகள் வெளியாகியுள்ளன. இதையடுத்து, ஒரு பிக் பாஸ் சீஸனைத் தொகுத்து வழங்குவதன் மூலம் ரூ. 200 கோடியை சம்பளமாகப் பெறுகிறார் சல்மான் கான். 

ஜனவரியில் முடிவதாக இருந்த இந்த வருட ஹிந்தி பிக் பாஸ், தற்போது 5 வாரங்கள் நீட்டிக்கப்பட்டு பிப்ரவரியில் முடியவுள்ளது. ஆனால், டபாங் 3, ராதே பட வேலைகளால், பிக் பாஸ் நிகழ்ச்சியை அவ்வளவு நாள்கள் தொகுத்து வழங்குவது கடினம் என்று கூறியிருக்கிறார் சல்மான். இந்நிலையில் அவருக்கு ஊதிய உயர்வு வழங்கப்பட்டுள்ளது. இதையடுத்து பிக் பாஸ் நிகழ்ச்சியில் தொடர்ந்து பணியாற்ற அவர் சம்மதித்துள்ளார்.