கேன்ஸ் திரைப்பட விழாவின் சிவப்புக் கம்பள வரவேற்பில் தீபிகா படுகோன் உள்பட இந்தியப் பிரபலங்கள் பலரும் கலந்துகொண்டார்கள்.

பிரான்ஸில் உள்ள கேன்ஸ் நகரில் 2022 கேன்ஸ் திரைப்பட விழா மே 17 முதல் 28 வரை நடைபெறுகிறது. கரோனா பரவல் காரணமாகக் கடந்த இரண்டு வருடங்களாக இப்படவிழா நடைபெறவில்லை. இதனால் இந்தமுறை பல்வேறு பிரபலங்கள் கலந்துகொண்டு விழாவைச் சிறப்பித்து வருகிறார்கள். மதிப்புமிக்க நாடாக இந்தியா இம்முறை தேர்வு செய்யப்பட்டுள்ளதால் இந்தியர்களின் பங்களிப்பு அதிகமாக இருக்கும் என எதிர்பார்க்கப்படுகிறது. ஆறு இந்தியப் படங்கள் பட விழாவில் திரையிடப்படுகின்றன. போட்டிப் பிரிவுக்கான நடுவர்களில் ஒருவராகப் பிரபல நடிகை தீபிகா படுகோன் தேர்வு செய்யப்பட்டுள்ளார்.

இந்தியாவின் சார்பில் மத்திய தகவல், ஒளிபரப்புத் துறை அமைச்சா் அனுராக் தாக்குா், நடிகர்கள் மாதவன், நவாசுதீன் சித்திகி, இயக்குநர் சேகர் கபூர், இசையமைப்பாளர் ஏ.ஆர். ரஹ்மான், நடிகைகள் தீபிகா படுகோன், தமன்னா, ஊர்வசி ரெளடேலா போன்றோர் சிவப்புக் கம்பள வரவேற்பில் கலந்துகொண்டார்கள்.