நடிகர் பிரகாஷ் ராஜ் தளபதி விஜய்யை நேரில் சென்று சந்தித்த புகைப்படம் இணையத்தில் பலரால் பகிரப்பட்டு வருகிறது. 

இயக்குநர் வம்சி இயக்கத்தில் தளபதி 66 திரைப்படத்தின் படப்பிடிப்பு விறுவிறுப்பாக நடைபெற்று வருகிறது. இந்த படத்தில் ராஷ்மிகா மந்தனா, ஷாம், சரத்குமார், யோகி பாபு, சம்யுக்தா, நடிகை சங்கீதா, தெலுங்கு நடிகர் ஸ்ரீகாந்த் என பெரும் நடிகர் பட்டாளமே நடித்து வருகிறது. 

இதனிடையே இந்த படத்தில் விஜய்யுடன் நடிகர் பிரகாஷ் ராஜ் இணையவுள்ளதாக தகவல்கள் பரவின. இந்நிலையில், நடிகர் பிரகாஷ் ராஜ் விஜய்யுடன் இருக்கும் படத்தைப் பகிர்ந்து தளபதி 66 படத்தில் நடிப்பதை உறுதி செய்துள்ளார். 

''ஹாய் செல்லம்ஸ்... தளபதி 66 படத்தில் மீண்டும் நாங்கள் கூட்டணி வைக்கிறோம்'' என்று பதிவிட்டுள்ளார். கில்லி பாணியில் ஹாய் செல்லம்ஸ் எனக் குறிப்பிட்டு தளபதி 66 படத்தில் நடிக்கும் தகவலை உறுதிப்படுத்தியுள்ளதால் ரசிகர்கள் மகிழ்ச்சி அடைந்துள்ளனர். 

ஸ்ரீ வெங்கடேஸ்வரா கிரியேஷன்ஸ் சார்பில் தயாரிப்பாளர் தில் ராஜூ தயாரிக்கிறார். படத்திற்கு இசையமைப்பாளர் தமன் இசையமைத்து வருகிறார். ஏற்கெனவே படத்தின் முதற்கட்ட படப்பிடிப்பு நிறைவடைந்த நிலையில் தற்போது இரண்டாம் கட்டப் படப்பிடிப்பு விறுவிறுப்பாக நடந்து வருகிறது.