துணிவு படத்தைத் தொடர்ந்து அஜித்தின் புதிய படத்தை யார் இயக்குவார் என்கிற எதிர்பார்ப்பு ரசிகர்கள் மத்தியில் இருந்தது. அந்த எதிர்பார்ப்புக்கு  அஜித் குமாரின் பிறந்தநாளை முன்னிட்டு கடந்த மே 1 ஆம் தேதி அவரின் புதிய படம் குறித்த அதிகாரபூர்வ அறிவிப்பு வெளியானது.

அதன்படி, அஜித்தின் அடுத்தப் படத்தை இயக்குநர் மகிழ் திருமேனி இயக்குவார் எனத் தெரிவிக்கப்பட்டுள்ளது. மேலும் படத்துக்கு விடாமுயற்சி எனவும் தலைப்பு வைத்துள்ளனர். லைகா நிறுவனம் தயாரிக்கும் இந்த படத்துக்கு அனிருத் இசையமைக்கிறார். நிரவ் ஷா ஒளிப்பதிவு செய்கிறார்.

முன்னதாக, இப்படத்தின் படப்பிடிப்பு புணேவில் தொடங்கவுள்ளதாகவும், அஜித்துக்கு ஜோடியாக த்ரிஷா நடிக்கவுள்ளதாகவும் தகவல்கள் வெளியாகியிருந்தது. 

இதையும் படிக்க | புஷ்பா - 2: ஃபகத் ஃபாசில் சிறப்புப் போஸ்டர் வெளியீடு

ஆனால், சில காரணங்களால் படப்பிடிப்பு ஒத்திவைக்கப்பட்டது. தொடர்ந்து, ஆகஸ்ட் மாத துவக்கத்தில் படப்பிடிப்பு தொடங்கும் என தகவல் வெளியானது. 

ஆனால், அஜித் மீண்டும் ஐரோப்பாவில் தன் இருசக்கர வாகனப் பயணத்தைத் துவங்கியுள்ளார். இதனால், விடாமுயற்சி என்ன ஆனது என ரசிகர்கள் கேள்வியெழுப்பி வருகின்றனர்.

இந்நிலையில், இப்படத்தில் முக்கிய கதாபாத்திரத்தில்  நடிகர் அர்ஜுன் நடிக்க உள்ளதாக தகவல் வெளியாகியுள்ளது. முன்னதாக, அஜித்துடன் மங்காத்தா படத்தில் அர்ஜுன் இணைந்து நடித்திருந்தது குறிப்பிடத்தக்கது.