புதுச்சேரியில் நடைபெற்று வரும் லால் சலாம் படப்பிடிப்பில் மீண்டும் கலந்துகொண்டார் நடிகர் ரஜினிகாந்த். குவிந்திருந்த ரசிகர்களைப் பார்த்து கை அசைத்த ரஜினிக்கு ரசிகர்கள் ஆரவாரம் செய்தனர்.

லைகா நிறுவனம் தயாரிக்கும் லால்சலாம் என்ற படத்தை நடிகர் ரஜினிகாந்தின் மகள் ஐஸ்வர்யா இயக்கி வருகிறார். நடிகர் ரஜினிகாந்த் கௌரவ வேடத்தில் நடிக்கும் இந்த படத்தில் நடிகர்கள் விஷ்ணுவிஷால், விக்ராந்த் ஆகியோர் கதாநாயகர்களாக நடிக்கின்றனர். 

இதன் முதல்கட்ட படிப்பிடிப்பு ஏற்கனவே மும்பை, திருவண்ணாமலையில் நடந்து முடிந்தநிலையில், அடுத்தகட்ட படப்பிடிப்பு புதுச்சேரியில் கடந்த சில தினங்களாக நடைபெற்று வருகிறது. படிப்பிடிப்பு துவங்கி முதல் 4 நாள்களில் நடிகர் ரஜினிகாந்த் கலந்துகொண்டு தனக்குரிய காட்சிகளில் நடித்தார். அதனை தொடர்ந்து படப்பிடிப்பில் கலந்துகொள்ளவில்லை. மற்ற நடிகர்களுக்கான காட்சிகள் தொடர்ந்து படமாக்கப்பட்டது.

இந்நிலையில் மீண்டும் ரஜினியின் காட்சிகளை படம்பிடிப்பதற்கான படப்பிடிப்பு தொடங்கிய நிலையில், இதில் பங்கேற்பதற்காக நடிகர் ரஜினிகாந்த் மீண்டும் புதுச்சேரி வந்தார். 

அப்போது நகரப்பகுதியில் உள்ள ஒரு ஓட்டலுக்கு செல்லும் போது அவரைப் பார்க்க ரசிகர்கள் குவிந்தனர். இதனையடுத்து நடிகர் ரஜினிகாந்த் தனது ரசிகர்களுக்கு கையை உயர்த்தி சைகை காண்பித்து புன்னகையுடன் டாடா காட்டி உள்ளே சென்றனர். இந்த வீடியோ சமூகவலைதளங்களில் வைரலாகி வருகிறது.