இயக்குநர் சுந்தர்.சியின் இயக்கத்தில் அரண்மனை திரைப்படம் 2014இல் வெளியாகி நல்ல வரவேற்பினைப் பெற்றது. இதில் ஹன்சிகா, ஆண்ட்ரியா, ராய் லக்‌ஷ்மி, வினய் ஆகியோர் முக்கிய கதாபாத்திரத்தில் நடித்திருந்தனர். இதன் வெற்றி காரணமாக, ’அரண்மனை - 2’ திரைப்படத்தை 2016இல் த்ரிஷா, ஹன்சிகாவை வைத்து இயக்கினார்.

பின்னர் இந்தப்படமும் வசூலைக் குவித்ததைத் தொடர்ந்து 2021-ல் ’அரண்மனை - 3’ எடுக்கப்பட்டது. இதில் ஆர்யா, ராஷி கண்ணா, ஆண்ட்ரியா முக்கிய வேடத்தில் நடித்தனர். இந்தப் படம் கலவையான விமர்சனங்களைப் பெற்றது.

தற்போது, ’அரண்மனை 4’ படத்தை சுந்தர்.சி இயக்கியுள்ளார். இப்படத்தில் யோகி பாபு, நடிகைகள் ராஷி கண்ணா, தமன்னா ஆகியோர் முக்கிய கதாபாத்திரத்தில் நடித்துள்ளனர்.

சமீபத்தில் இப்படத்தின் டிரைலர் வெளியாகி கவனம் பெற்றது. ஹிப்ஹாப் ஆதி இசையமைத்துள்ள இந்தப் படத்தின் முதல் பாடலான ‘அச்சச்சோ’ பாடல் தமிழ் புத்தாண்டை முன்னிட்டு இன்று (ஏப். 14) வெளியாகி ரசிகர்களின் கவனத்தை ஈர்த்து வருகிறது.

இப்படம் ஏப்ரல் 26 ஆம் தேதி வெளியிட உள்ளதாக முன்னர் அறிவிக்கப்பட்டிருந்தது. இந்நிலையில், மே.3ஆம் தேதி வெளியாகுமென படக்குழு அதிகாரபூர்வமாக தெரிவித்துள்ளது.

நல்ல விஷயங்கள் நேரமெடுக்கும் எனப் படக்குழு தெரிவித்துள்ளது.