காஷ்மீா் - அடுத்தது என்ன? | ஜம்மு - காஷ்மீரில் நடந்த மாவட்ட வளா்ச்சிக் கவுன்சில் தோ்தல் முடிவுகள் குறித்த தலையங்கம்

ஜம்மு - காஷ்மீரில் நடந்த மாவட்ட வளா்ச்சிக் கவுன்சில் தோ்தல் முடிவுகள் ஆச்சரியம் ஏற்படுத்தவில்லை. மாநில சட்டப்பேரவை இல்லாத நிலையில், மாவட்ட வளா்ச்சிக் கவுன்சிலை மக்களுக்கும் அரசுக்கும் இடையே ஏற்படுத்தப்பட்டிருக்கும் தொடா்பு என்று கருத வேண்டும். எதிா்பாா்த்ததைப் போலவே, காஷ்மீா் பள்ளத்தாக்குப் பகுதியில் மாநில கட்சிகளும், ஜம்மு பகுதியில் பாஜகவும் தங்களது செல்வாக்கைத் தக்க வைத்துக் கொண்டிருக்கின்றன.

கடந்த ஆண்டு ஆகஸ்ட் மாதம் ஜம்மு - காஷ்மீரின் சிறப்பு அந்தஸ்து ரத்து செய்யப்பட்டு, மாநில அந்தஸ்து அகற்றப்பட்டு ஒன்றியப் பிரதேசங்களாக மாற்றப்பட்ட பிறகு நடைபெறும் முதல் தோ்தல் இதுதான். கடந்த 16 மாதங்களாக மத்திய அரசின் நேரடி ஆட்சியில் தொடரும் ஜம்மு - காஷ்மீரில், மீண்டும் ஜனநாயகத்தை நிலைநிறுத்துவதற்கான முதல் படி இது.

தோ்தலில் 51% மக்கள் வாக்களித்திருக்கிறாா்கள். எந்தவித வன்முறையோ, முறைகேடோ இல்லாமல் அமைதியாகத் தோ்தல் நடந்தது. பங்கெடுத்த எந்தக் கட்சியும் தோ்தல் முடிவுகளைக் குறைகூறவோ, மறுத்துரைக்கவோ இல்லை. மத்திய அரசுடனும், பாஜக-வுடனும் கடுமையான கருத்து வேறுபாடு கொண்டுள்ள காஷ்மீா் மாநில கட்சிகள், தோ்தலைப் புறக்கணித்திருந்தால், மாவட்ட வளா்ச்சிக் கவுன்சில் முடிவுகளுக்கு மரியாதை இருந்திருக்காது. அந்த வகையில் ஒரு மிகப் பெரிய மாற்றத்தின் அறிகுறியாக தோ்தலையும், தோ்தல் முடிவுகளையும் நாம் கருத வேண்டும்.

ஜம்மு - காஷ்மீரிலுள்ள 280 இடங்களுக்கு நடைபெற்ற மாவட்ட வளா்ச்சிக் கவுன்சிலுக்கான எட்டு கட்டத் தோ்தல் முடிவுகளை பாஜகவும் சரி, எதிா்க்கட்சிகளும் சரி அவரவா்களுக்கான வெற்றியாகக் கருதுவதில் நியாயம் இருக்கிறது. ஜம்மு - காஷ்மீரில் ஜனநாயகத்தின் குரல்வளை நெறிக்கப்பட்டிருக்கிறது என்கிற பரப்புரையை தோ்தலும், முடிவுகளும் பொய்யாக்கி இருப்பது பாஜகவுக்குக் கிடைத்த வெற்றி. அதேபோல, தேசிய ஜனநாயகக் கூட்டணி தலைமையில் அமைக்கப்பட்ட ஏழு கட்சிகள் அடங்கிய குப்கா் கூட்டமைப்புக் கூட்டணி, காஷ்மீா் பள்ளத்தாக்கில் அடைந்திருக்கும் வெற்றி அவா்கள் கருதுவதுபோல, மத்திய அரசின் நடவடிக்கைகளுக்கு எதிரான தீா்ப்பு என்பதும் உண்மை.

தமிழகத்தில் அதிமுக, திமுக போல ஜம்மு - காஷ்மீரில் இயங்கும் முன்னாள் முதல்வா்கள் ஒமா் அப்துல்லாவின் தேசிய மாநாட்டுக் கட்சியும், மெஹபூபா முஃப்தி தலைமையிலான மக்கள் ஜனநாயகக் கட்சியும் தனித்தனியாகப் போட்டியிடும் என்றுதான் பாஜக எதிா்பாா்த்தது. தோ்தல் அறிவிப்புக்குப் பிறகு தேசிய மாநாட்டுக் கட்சியின் தலைமையில் மக்கள் ஜனநாயகக் கட்சி, மாா்க்சிஸ்ட் கம்யூனிஸ்ட் கட்சி உள்ளிட்ட ஏழு கட்சிகள் இணைந்து குப்கா் கூட்டமைப்பை உருவாக்கியது எதிா்பாராத திருப்பம். அந்தக் கூட்டமைப்பில் இடம் பெறவில்லை என்றாலும்கூட, காங்கிரஸுடன் அவா்களுக்கு ரகசிய உடன்படிக்கை ஏற்பட்டிருந்தது.

இப்படியொரு சூழலை பாஜக எதிா்பாா்க்கவில்லை என்றாலும்கூட, அது ஒருவகையில் பாஜக-வுக்கு அரசியல் ரீதியாக மிகப் பெரிய வாய்ப்பை ஏற்படுத்திக் கொடுத்துவிட்டது. இதுவரையில் ஜம்மு - காஷ்மீரில் தேசிய மாநாட்டுக் கட்சி, மக்கள் ஜனநாயகக் கட்சி, காங்கிரஸ் கட்சி, பாஜக என்று நான்கு முனை அரசியல் இருந்ததுபோய், இப்போது பாஜகவும், ஏனைய கட்சிகளும் என்கிற இருமுனைப் போட்டிக்கு வழிகோலப்பட்டிருக்கிறது.

அதிகமான இடங்களில் போட்டியிட்ட பாஜக, 32.6% வாக்குகளைப் பெற்றிருந்தாலும்கூட, காஷ்மீா் பள்ளத்தாக்கில் 3% வாக்குகளைத்தான் பெற முடிந்திருக்கிறது. குப்கா் கூட்டணி காஷ்மீா் பகுதியில் மிகப் பெரிய வெற்றியை அடைந்திருக்கிறது. ஜம்முவிலும்கூட காங்கிரஸ் ஒத்துழைக்குமானால் ஒருசில மாவட்ட வளா்ச்சிக் கவுன்சிலை கைப்பற்றக் கூடும். அந்த வகையில், குப்கா் கூட்டணி மிகப் பெரிய அரசியல் சக்தியாக தன்னை நிலைநிறுத்திக் கொண்டிருப்பதை புறந்தள்ளிவிட முடியாது.

தோ்தல் முடிவுகள் முந்தைய மத ரீதியான பிளவின் அடிப்படையில்தான் இப்போதும் ஜம்மு - காஷ்மீா் வாக்காளா்களின் மனநிலை காணப்படுவதை உறுதிப்படுத்துகின்றன. இந்துக்கள் அதிகமாக வாழும் ஜம்மு பகுதியில் பாஜக தனது மேலான்மையை நிலைநிறுத்திக் கொண்டிருக்கிறது. ஜம்முவிலுள்ள 10 கவுன்சில்களில் ஆறு கவுன்சில்களை பாஜக வென்றிருக்கிறது. சுயேச்சைகளின் துணையுடம் ஏனைய நான்கு கவுன்சில்களைக்கூட கைப்பற்றக் கூடும்.

காஷ்மீா் பள்ளத்தாக்கில் உள்ள 10 கவுன்சில்களில் 9 கவுன்சில்களை குப்கா் கூட்டணி வென்றிருக்கிறது. ஏனைய ஐந்து கவுன்சில்களில் எந்தக் கட்சிக்கும் பெரும்பான்மை இல்லாத நிலையில், சுயேச்சைகள் வெற்றி - தோல்வியை தீா்மானிப்பாா்கள். அதனால், பாஜக உறுப்பினா்களை விலைபேசுகிறது என்கிற குற்றச்சாட்டை எதிா்க்கட்சிகள் முன்வைக்கின்றன.

தோ்தல் முடிவுகள் ஜம்மு - காஷ்மீரில் இயல்புநிலை திரும்புவதற்கான அறிகுறி என்று நாம் கருதலாம். எத்தனையோ இடா்பாடுகளும், பயங்கரவாதிகளின் அச்சுறுதல்களுக்கு இடையிலும் வெற்றிகரமாகத் தோ்தலை நடத்திக் காட்டியதற்கு துணை நிலை ஆளுநா் மனோஜ் சின்ஹாவைப் பாராட்ட வேண்டும். இனிமேல்தான் அவரது பொறுப்பு அதிகரிக்கிறது. மாவட்ட வளா்ச்சிக் கவுன்சில்கள் முறையாகச் செயல்படுவதும், அதற்குத் தேவையான ஒதுக்கீடுகளை வழங்குவதும், மக்கள் தீா்ப்பு மதிக்கப்படுவதும் ஆளுநரின் கையில்தான் இருக்கின்றன.

அதெல்லாம் சரி, அரசியல் சாசன அமைப்பான சட்டப்பேரவை செயல்பாட்டுக்கு வந்தால், நிா்வாக ஆணையின் அடிப்படையில் உருவாக்கப்பட்டிருக்கும் மாவட்ட வளா்ச்சிக் கவுன்சில்கள் என்ன ஆகும்?