கோழிக்கோடு: என்ன கழிவறையா? அதெல்லாம் கிடையாது. தண்ணீரைக் குறைவாகக் குடியுங்கள். அல்லது டியூப் பயன்படுத்துங்கள்..

டெய்லராக இருந்து சமூக ஆர்வலராக மாறிய விஜி, தான் பணியாற்றும் நிறுவனத்தின் உரிமையாளரிடம் கழிவறைப் பற்றி முதலில் கேட்டபோது கிடைத்த பதில்தான் அது.

2009 - 2010 சமயங்களில் கேரளாவில் எஸ்எம் சாலையில் உள்ள நிறுவனங்கள் அனைத்திலும் இதுதான் நிலை. ஏராளமான போராட்டங்கள், வேலை நிறுத்தம் என 8 ஆண்டுகள் நீடித்த போராட்டத்தின் இறுதியாக அவரது கோரிக்கை 2018ம் ஆண்டு நிறைவேற்றப்பட்டது. இதன் மூலம் விஜி சர்வதேச அளவில் அறியப்பட்ட பெண்களில் ஒருவரானார்.

இதன் காரணமாகத்தாக பிபிசி தனது அதிகாரமிக்க 100 பெண்மணிகளின் பட்டியலில்  விஜியை இணைத்தது. விஜிக்கு 73வது இடம் கிடைத்தது.

பொறுப்பில்லாத தந்தை, கடுமையாக உழைத்துக் குடும்பத்தைக் காப்பாற்றும் தாய் அடைந்த துயரங்கள் அனைத்துமே விஜியை பிற்காலத்தில் சமூகப் போராளியாக மாற்றியது.

கழிவறை இல்லாததால் எஸ்எம் சாலையில் பணியாற்றும் ஏராளமான பெண்கள் சிறுநீரகப் பாதிப்பு ஏற்பட்டு துயரப்படுவதைப் பார்த்த விஜி கழிவறைக் கட்டுமாறு வலியுறுத்தி போராட்டத்தைத் தொடங்கினார்.  8 ஆண்டுகளுக்குப் பிறகு அவருக்கே வெற்றி.

உங்களது போராட்டங்கள் முடிந்துவிட்டனவா? அடுத்து என்ன? என்றக் கேள்விக்கு அவரிடம் இருந்து சட்டென்று வரும் பதில்.. "இல்லை. ஆண்களுக்கு இணையாக பெண்களையும் பார்க்க வேண்டும். சமமான ஊதியம், சமமான பணிநேரமே அடுத்த இலக்கு" என்கிறார் அவர் உறுதியாக.