ம.பி: அமைச்சர் படத்துடன் 2000 பரிசு பொருள்கள் பறிமுதல்

மத்தியப் பிரதேசத்தில் தேர்தல் நடத்தை விதிகள் அமலுக்கு வந்துள்ள நிலையில் தமோ மாவட்டத்தில் 2 ஆயிரம் பைகளில் அம்மாநில நிதியமைச்சர் ஜெயந்த் மல்லையாவின் புகைப்படத்துடன் கூடிய பரிசு பொருள்களை தேர்தல் அதிகாரிகள் பறிமுதல் செய்தனர். 
மத்தியப் பிரதேசம் உள்ளிட்ட 5 மாநிலங்களில் தேர்தல் நடைபெறும் தேதியை தேர்தல் ஆணையம் கடந்த சனிக்கிழமை அறிவித்தது. இம்மாநிலங்களில் உடனடியாக நடத்தை விதிகள் அமலுக்கு வருவதாகவும் தேர்தல் ஆணையம் தெரிவித்துள்ளது.
மத்தியப்பிரதேசத்தில் நவம்பர் 28ம் தேதி வாக்குப்பதிவும், டிசம்பர் 11ம் தேதி வாக்கு எண்ணிக்கையும் நடைபெற உள்ளது. 
இந்நிலையில், வருவாய் கோட்டாட்சியர் ரவீந்திர செளக்ஷேக்கு வந்த புகாரின் அடிப்படையில் ஞாயிற்றுகிழமை நடத்திய சோதனையில் 2,000 பேக்குகளில் சானிடரி நாப்கின்கள் மற்றும் சோப்புகள் அடங்கிய மூட்டையை கைப்பற்றினர். அந்த பைகளில் அமைச்சர் ஜெயந்த் மல்லையாவின் புகைப்படமும், அரசின் சாதனை குறிப்புகளும் அதில் இருந்தது கண்டறியப்பட்டது. இதுவரை யாருக்கும் விநியோகிக்கப்படாத அந்த பரிசுபொருள்கள் தேர்தல் நடத்தை விதிகளை மீறி வைக்கப்பட்டிருந்தது தெரிய வந்ததால் அவற்றை பறிமுதல் செய்ததாக அதிகாரிகள் தெரிவித்தனர். 
மத்தியப் பிரதேச புறநகர் வாழ்வாதார இயக்கத்தின் கீழ் இயங்கி வரும் சுய உதவிக்குழுக்களுக்கு அனுப்பி வைப்பதற்காக அந்தப் பரிசு பொருள்கள் தயார் நிலையில் வைக்கப்பட்டிருந்ததாக ரவீந்திர செளக்ஷே தெரிவித்தார். 
பல்வேறு பகுதிகளில் இருந்து கைப்பற்றப்பட்ட இந்தப் பரிசு பொருள்களில் 600 பைகளை வைத்திருந்ததாக சுய உதவிக்குழுவின் மேலாளர் அகிலேஷ் சுக்லா மற்றும் அவரது ஓட்டுநர் லால்சந்த் அகிர்வார் ஆகியோர் மீது வழக்குப்பதிவு செய்யப்பட்டதாக அதிகாரிகள் தெரிவித்தனர்.