சிக்கிம் மாநிலத்தில் புதிதாக தேர்வு செய்யப்பட்டுள்ள சட்டப்பேரவை உறுப்பினர்களில் ஒருவர் மீது கூட குற்றப் பின்னணி கிடையாது என்கிற தகவல் அசோசியேஷன் ஃபார் டெமாக்ரடிக் ரீஃபார்ம்ஸ் ஆய்வில் தெரியவந்துள்ளது. 

17-வது மக்களவைத் தேர்தலோடு சிக்கிம் மாநிலத்தில் சட்டப்பேரவைத் தேர்தல் நடைபெற்றது. இதில் சிக்கிம் கிராந்திகாரி மோர்ச்சா சார்பில் 17 பேரும், சிக்கிம் ஜனநாயக முன்னணி சார்பில் 15 பேரும் வெற்றி பெற்றனர். 

இந்த 32 சட்டப்பேரவை உறுப்பினர்களில் எந்தவொரு சட்டப்பேரவை உறுப்பினருக்கும் குற்றப் பின்னணியே இல்லை என்று அசோசியேஷன் ஃபார் டெமாக்ரடிக் ரீஃபார்ம்ஸ் தெரிவித்துள்ளது. 2009-க்கு பிறகு குற்றப் பின்னணி இல்லாத உறுப்பினர்கள் சிக்கிம் சட்டப்பேரவைக்கு தேர்வாகியுள்ளது இதுவே முதன்முறை. 

சிக்கிம் சட்டப்பேரவையில் 3 பெண் உறுப்பினர்கள் மட்டுமே உள்ளனர். 41 - 50 வயதுக்கிடையிலான உறுப்பினர்களே சட்டப்பேரவையில் அதிகளவில் உள்ளனர்.