பெங்களூரு: இரண்டு நாள்கள் பயணமாக பிரதமா் நரேந்திர மோடி இன்று கா்நாடகம் வருகை தரவிருக்கும் நிலையில், டிவிட்டரில் #கோபேக்மோடி என்ற ஹேஷ்டேக்  பல மணி நேரமாக டிரெண்டாகி வருகிறது.

ஏற்கனவே, பிரதமர் நரேந்திர மோடி சென்னைக்கு வருகை தரும்போதெல்லாம் இந்த ஹேஷ்டேக் டிரெண்டாகியிருக்கும் நிலையில், பாஜக ஆளும் கர்நாடகாவுக்கு மோடி வருகை தரவிருக்கும் நிலையில், இந்த ஹேஷ்டேக் மீண்டும் டிரெண்டாகியிருக்கிறது.

புதுதில்லியில் இருந்து வியாழக்கிழமை  பெங்களூருக்கு தனிவிமானம் மூலம் வரும் பிரதமா் மோடி, விமான நிலையத்தில் இருந்து ஹெலிகாப்டா் வழியாக தும்கூரு புறப்பட்டு செல்கிறாா். அங்குள்ள சித்தகங்கா மடத்துக்கு செல்லும் பிரதமா், ஒரு மணி நேரம் அங்கிருக்கிறாா்.

பின்னா், தும்கூரில் உள்ள அரசு இளநிலை கல்லூரி மைதானத்தில் மாலை 3மணிக்கு கா்நாடக பாஜகவின் விவசாயி அணி சாா்பில் நடக்கவிருக்கும் வேளாண் விருது, மீன்பிடி கருவிகள் வழங்கும் விழாவில் கலந்துகொள்கிறாா். அதன்பிறகு, பெங்களூரு திரும்பும் பிரதமா் மோடி, ராணுவ ஆராய்ச்சி மற்றும் மேம்பாட்டு அமைப்பிற்கு சென்று பாா்வையிடுகிறாா்.

அங்கு விஞ்ஞானிகளைச் சந்தித்த பிறகு, அன்றிரவு ஆளுநா் மாளிகையில் தங்குகிறாா். மறுநாள் டிச.3ஆம் தேதி பெங்களூரு ஜக்கூரில் உள்ள காந்தி வேளாண் அறிவியல் மைய வளாகத்தில் நடக்கும் 107ஆவது இந்திய அறிவியல் காங்கிரஸ் விழாவில் கலந்துகொண்ட பிறகு, நண்பகல் 2 மணிக்கு தில்லி புறப்பட்டு செல்கிறாா்.

பிரதமா் மோடியின் வருகைக்காக பாதுகாப்பு ஏற்பாடுகள் தீவிரமாக்கப்பட்டுள்ளன. பிரதமா் மோடியின் வருகையைமுன்னிட்டு பாதுகாப்பு பலப்படுத்தப்பட்டுள்ளது. பெங்களூருக்கு வியாழக்கிழமை வரும் பிரதமா் மோடியை ஆளுநா் வஜுபாய் வாலா, முதல்வா் எடியூரப்பா, மாநகாரட்சி மேயா் கௌதம்குமாா் வரவேற்கின்றனா்.