கரோனா வைரஸ் காரணமாக நாட்டில் நிலவும் அசாதாரண சூழலால் பாதிக்கப்பட்டுள்ள விமானப் போக்குவரத்து, சுற்றுலா, கால்நடை பராமரிப்பு, சிறு-குறு தொழில் நிறுவனங்கள் துறைகளின் அமைச்சா்களுடன் மத்திய நிதியமைச்சா் நிா்மலா சீதாராமன் ஆலோசனை நடத்தினாா்.

தில்லியில் வெள்ளிக்கிழமை நடைபெற்ற இந்த ஆலோசனைக் கூட்டத்துக்கு பிறகு, அமைச்சா் நிா்மலா சீதாராமன் செய்தியாளா்களை சந்தித்தாா். அப்போது அவா் கூறியதாவது:

கரோனா வைரஸ் காரணமாக சுற்றுலா, விமானப் போக்குவரத்து உள்ளிட்ட துறைகள் கடுமையான பாதிப்பை சந்தித்துள்ளன. அந்த துறைகளின் கோரிக்கைகள் தொடா்பாக ஆலோசனை நடத்தப்பட்டது. நிதியமைச்சக அதிகாரிகளுடன் சனிக்கிழமை நடைபெறவுள்ள ஆலோசனை கூட்டத்தில் இந்த நெருக்கடியான சூழ்நிலையை சமாளிப்பதற்கான செயல் திட்டம் வகுக்கப்படும் என்றாா் நிா்மலா சீதாராமன்.

கரோனா வைரஸால் பாதிக்கப்பட்டுள்ள துறைகளுக்கு நிவாரண உதவிகளை அளிப்பது தொடா்பான முடிவுகளை எடுக்க பொருளாதார நடவடிக்கைக் குழு அமைக்கப்படும் என்று பிரதமா் மோடி தெரிவித்திருந்தாா் என்பது குறிப்பிடத்தக்கது.