திருமலையில் தமிழக ஆளுநா் பன்வாரிலால் புரோஹித் வெள்ளிக்கிழமை சுவாமி தரிசனம் செய்தாா்.

ஏழுமலையானை வழிபட வியாழக்கிழமை மாலை திருமலைக்கு வந்த அவரை தேவஸ்தான அதிகாரிகள் மலா்ச்செண்டு அளித்து வரவேற்று தங்கும் வசதி செய்து கொடுத்தனா். இரவு திருமலையில் தங்கிய அவா் வெள்ளிக்கிழமை காலை விஐபி பிரேக் தரிசனத்தில் ஏழுமலையானைத் தரிசித்தாா்.

அதன் பின் அவருக்கு தேவஸ்தான அதிகாரிகள் ரங்கநாயக மண்டபத்தில் ஏழுமலையான் சேஷவஸ்திரம் அணிவித்து, தீா்த்தப் பிரசாதம், லட்டு, வடை, சுவாமி படம் உள்ளிட்டவற்றை வழங்கி வேத பண்டிதா்கள் ஆசிா்வாதம் செய்தனா். அவற்றை பெற்றுக் கொண்டு கோயிலை விட்டு வெளியில் வந்த அவா், திருமலையில் உள்ள நாதநீராஜன மண்டபத்தில் நடந்து வரும் சுந்தரகாண்ட பாராயணத்தில் கலந்து கொண்டாா். பாராயணம் நிறைவு பெற்ற பின் அவா் செய்தியாளா்களிடம் கூறியது:

தினமும் ஆயிரக்கணக்கான பக்தா்கள் திருமலைக்கு வரும்போதிலும் இங்கு பராமரிக்கப்படும் சுத்தமும் சுகாதாரமும் பாராட்டுக்குரியது. பொது முடக்க விதிமுறைகளைப் பின்பற்றி தேவஸ்தான அதிகாரிகள் தரிசன விதிகளை திறம்பட வகுத்து பக்தா்களுக்கு ஏழுமலையான் தரிசனத்தை அளித்து வருகின்றனா். நான் அனுமன் பக்தன். தினமும் ‘அனுமன் சாலிசா’வைப் படித்து வருகிறேன்.

தற்போது சுந்தரகாண்ட பாராயணத்தில் கலந்து கொண்டேன். ஹிந்து சனாதன தா்மத்தையும், பாரத தேசத்தின் பெருமைகளையும் பக்தா்களிடம் கொண்டு சோ்க்கும் இந்த சுந்தரகாண்ட பாராயணம், நூறாவது நாளை எட்டியுள்ளது. இந்நாளில் நான் பாராயணத்தில் கலந்து கொண்டது மகிழ்ச்சி அளிக்கிறது என்றாா் அவா்.