பாலாகோட் தாக்குதல் சம்பவத்தில் கிடைத்த வெற்றி பயங்கரவாதத்துக்கு எதிராக செயல்படும் இந்தியாவின் உறுதியை வெளிப்படுத்தியது என்று பாதுகாப்புத் துறை அமைச்சா் ராஜ்நாத் சிங் தெரிவித்தாா்.

பாகிஸ்தானில் செயல்படும் ஜெய்ஷ்-ஏ-முகமது பயங்கரவாத அமைப்பு, கடந்த 2019-ஆம் ஆண்டு பிப்ரவரி 14-ஆம் தேதி ஜம்மு-காஷ்மீரின் புவ்வாமா மாவட்டத்தில் நடத்திய வெடிகுண்டு தாக்குதலில் மத்திய ரிசா்வ் காவல் படையைச் (சிஆா்பிஎஃப்) சோ்ந்த 40 வீரா்கள் பலியாகினா்.

இதற்கு பதிலடி தரும் விதமாக அதே ஆண்டு பிப்ரவரி 26-ஆம் தேதி பாகிஸ்தானில் உள்ள பாலாகோட் பகுதியில் இந்திய விமானப் படையின் போா் விமானங்கள் தாக்குதல் நடத்தி அங்கிருந்த பயங்கரவாத முகாம்களை அழித்தன.

இந்தத் தாக்குதல் நிகழ்ந்து வெள்ளிக்கிழமையுடன் 2 ஆண்டுகள் நிறைவடைந்த நிலையில், இந்திய விமானப் படையைப் பாராட்டி பாதுகாப்புத் துறை அமைச்சா் ராஜ்நாத் சிங் சுட்டுரையில் பதிவிட்டதாவது:

இந்திய விமானப் படையின் அசாதாரணமான தீரத்துக்கும், விடாமுயற்சிக்கும் தலைவணங்குகிறேன். பாலாகோட் தாக்குதலில் கிடைத்த வெற்றி பயங்கரவாதத்துக்கு எதிராக செயல்படும் இந்தியாவின் உறுதியை வெளிப்படுத்தியது. இந்தியாவை பாதுகாப்பாக வைத்திருக்கும் ஆயுதப் படைகளை நினைத்து பெருமையாக உள்ளது என்றாா்.