மாநிலங்களின் கையிருப்பில் 1.89 கோடி தடுப்பூசிகள்: மத்திய அரசு

மாநிலங்கள் மற்றும் யூனியன் பிரதேசங்களின் கையிருப்பில் இன்னும் 1.89 கோடி தடுப்பூசிகள் பயன்படுத்தப்படாமல் இருப்பதாக மத்திய சுகாதாரத் துறை அமைச்சகம் வியாழக்கிழமை தெரிவித்தது.

நாடு முழுவதும் புதிய தடுப்பூசி கொள்கை அமல்படுத்தப்பட்டு 3 நாள்களில் 2 கோடி தடுப்பூசிகள் செலுத்தப்பட்டுள்ளதாகவும் அமைச்சகம் தெரிவித்துள்ளது.

தடுப்பூசிகள் கையிருப்பு நிலவரம் பற்றி அமைச்சகம் வெளியிட்ட அறிவிப்பில் தெரிவிக்கப்பட்டுள்ளது:

"நேரடியாகக் கொள்முதல் செய்தது உள்பட மொத்தம் 30,33,27,440 தடுப்பூசிகள் மாநிலங்கள் மற்றும் யூனியன் பிரதேசங்களுக்கு வழங்கப்பட்டுள்ளன. இதில் வீணானவை உள்பட மொத்தம் 28,43,40,936 தடுப்பூசிகள் பயன்படுத்தப்பட்டுள்ளன (காலை 8 மணிக்கு வரையிலான தரவுகளின் அடிப்படையில்).  

மாநிலங்கள் மற்றும் யூனியன் பிரதேசங்களின் கையிருப்பில் இன்னும் 1,89,86,504 தடுப்பூசிகள் பயன்படுத்தப்படாமல் உள்ளன. அடுத்த 3 நாள்களில் 21,05,010 தடுப்பூசிகள் வழங்கப்படவுள்ளன."