நான் ஹிந்து என்பதால் கோயில்களுக்குச் செல்வேன்: கேஜரிவால்

தான் ஒரு ஹிந்து என்பதால் கோயில்களுக்குச் செல்வதாக தில்லி முதல்வர் அரவிந்த் கேஜரிவால் இன்று (ஞாயிற்றுக்கிழமை) தெரிவித்தார்.

இரண்டு நாள் பயணமாக கோவா சென்றுள்ள அரவிந்த் கேஜரிவால் இன்று செய்தியாளர்களைச் சந்தித்தார். அப்போது கோயில்களுக்குச் செல்வதன் மூலம் ஹிந்துத்துவத்துக்கு ஆதரவாக மென்மையான போக்கைக் கடைப்பிடிக்கிறீர்களா என்ற கேள்வி எழுப்பப்பட்டது.

இதற்கு கேஜரிவால் பதிலளித்ததாவது:

"நீங்கள் கோயில்களுக்குச் செல்வீர்களா? நானும் செல்வேன். கோயில்களுக்குச் செல்வதில் எந்தத் தவறும் இல்லை. கோயில்களுக்குச் சென்றால் அமைதியை உணரலாம். இதில் அவர்களுக்கு (ஹிந்துத்துவ குற்றச்சாட்டை எழுப்புபவர்கள்) என்ன ஆட்சேபனை உள்ளது? எதற்காக ஆட்சேபனை இருக்க வேண்டும்?

நான் ஹிந்து என்பதால் கோயில்களுக்குச் செல்கிறேன். எனது மனைவி கௌரிஷங்கர் கோயிலுக்குச் செல்வார்." என்றார் கேஜரிவால்.