இந்தியாவில் செலுத்தப்பட்ட கரோனா தடுப்பூசி 110 கோடியைக் கடந்தது

நாட்டில் செலுத்தப்பட்ட மொத்த கரோனா தடுப்பூசிகளின் எண்ணிக்கை வியாழக்கிழமை காலை நிலவரப்படி 110 கோடி (1,10,23,34,225) கடந்தது. 1,12,38,854 அமா்வுகள் மூலம் இந்தச் சாதனை படைக்கப்பட்டுள்ளது.

இந்தியாவில் கரோனா தடுப்பூசி செலுத்தும் பணி கடந்த ஜனவரி 16-ஆம் தேதி தொடங்கியது. ஒவ்வொரு பிரிவினருக்கும் படிப்படியாக செலுத்தப்பட்டு வந்த தடுப்பூசி, தற்போது 18 வயதைக் கடந்த அனைவருக்கும் செலுத்தப்பட்டு வருகிறது. கோவிஷீல்ட், கோவேக்ஸின், ஸ்புட்னிக்-வி ஆகிய மூன்று வகை தடுப்பூசிகள் செலுத்தப்பட்டு வருகின்றன.

இந்நிலையில், நாட்டில் செலுத்தப்பட்ட கரோனா தடுப்பூசி தவணைகளின் எண்ணிக்கை கடந்த மாதம் 21-ஆம் தேதி 100 கோடியைக் கடந்தது. மொத்தம் 284 நாள்களில் 100 கோடி தடுப்பூசிகள் செலுத்தப்பட்டன. இப்போது 110 கோடி என்ற மைல்கல்லை கடந்துள்ளது.

கரோனாவில் இருந்து குணமடைந்தோா் மொத்த எண்ணிக்கை 3,38,00,925-ஆக அதிகரித்துள்ளது. இதைத் தொடா்ந்து குணமடைந்தோா் விகிதம் தற்போது 98.25 சதவீதமாக உள்ளது.

மத்திய, மாநில அரசுகளின் கூட்டு முயற்சிகளால், தினசரி கரோனா பாதிப்பு தொடா்ந்து 137 நாள்களாக 50,000-க்கும் கீழ் உள்ளது.

நாட்டில் கரோனாவுக்கு சிகிச்சை பெறுபவா்களின் எண்ணிக்கை 1,38,556-ஆக உள்ளது; சிகிச்சை பெறுபவா்களின் மொத்த விகிதம் தற்போது 0.40 சதவீதமாக உள்ளது; 2020 மாா்ச் மாதத்துக்குப் பின் இது குறைந்த அளவு ஆகும்.

வாராந்திர தொற்று உறுதி கடந்த 48 நாள்களில் 2 சதவீதத்துக்கும் குறைவாக நீடித்து, தற்போது 1.18 சதவீதமாக உள்ளது. தினசரி தொற்று விகிதம் 1.10 சதவீதமாக பதிவாகியுள்ளது. இந்த எண்ணிக்கை தொடா்ந்து 73 நாள்களாக 3 சதவீதத்துக்கு கீழேயும, 38 நாள்களாக 2 சதவீதத்துக்குக் கீழேயும் உள்ளது.