வெளியுறவுத் துறை அமைச்சா் எஸ்.ஜெய்சங்கரை கூகுள் நிறுவனத்தின் தலைமை செயல் அதிகாரி (சிஇஓ) சுந்தா் பிச்சை செவ்வாய்க்கிழமை சந்தித்தாா்.

இது குறித்து அமைச்சா் ஜெய்சங்கா் வெளியிட்ட ட்விட்டா் பதிவில், ‘செவ்வாய்க்கிழமை பிற்பகலில் கூகுள் சிஇஓ சுந்தா் பிச்சையை சந்தித்தேன். இந்தியாவின் எண்ம (டிஜிட்டல்) துறையில் ஏற்பட்டுள்ள மாற்றங்கள் குறித்தும் உலகின் உத்தி ரீதியிலான மேம்பாடு குறித்தும் விவாதித்தோம்’ எனத் தெரிவித்தாா்.

முன்னதாக, புது தில்லியில் திங்கள்கிழமை நடைபெற்ற கூகுள் ஃபாா் இந்தியா என்ற நிகழ்ச்சியில் பங்கேற்று, கூகுளின் குரல் மற்றும் எழுத்து வடிவிலான தேடல் வசதியை 100-க்கும் மேற்பட்ட இந்திய மொழிகளில் கட்டமைத்து வருவதாகவும் பெண்கள் தலைமையிலான புத்தாக்கத் தொழில் நிறுவனங்களுக்கு (ஸ்டாா்ட் அப்) உதவும் வகையில் 7.5 கோடி டாலா்கள் (சுமாா் ரூ. 620 கோடி) செலவிட உள்ளதாகவும் அவா் தெரிவித்தாா்.

நிகழ்ச்சியில் மத்திய தகவல் தொடா்புத் துறை அமைச்சா் அஸ்வினி வைஷ்ணவ் பங்கேற்றாா். பின்னா் குடியரசுத் தலைவா் திரௌபதி முா்மு, பிரதமா் நரேந்திர மோடியை சந்தித்தாா்.

இதையடுத்து, வெளியுறவுத் துறை அமைச்சா் ஜெய்சங்கரை சந்தித்து, இந்தியாவில் கூகுள் நிறுவனத்தின் செயல்பாடுகள் குறித்து விளக்கியுள்ளாா்.