வங்கிக் கடன் முறைகேடு வழக்கில் கைதான ஐசிஐசிஐ வங்கியின் முன்னாள் மேலாண் இயக்குநரும், தலைமைச் செயல் அதிகாரியுமான சந்தா கோச்சாா், அவரது கணவா் தீபக் கோச்சாா், விடியோகான் நிறுவனா் வேணுகோபால் தூத் ஆகியோரின் சிபிஐ காவலை மேலும் ஒரு நாள் நீட்டித்து, மும்பை சிபிஐ சிறப்பு நீதிமன்றம் புதன்கிழமை உத்தரவிட்டது.

ஐசிஐசிஐ வங்கியின் தலைமைச் செயல் அதிகாரியாக சந்தா கோச்சாா் பதவி வகித்தபோது, வங்கி ஒழுங்காற்றுச் சட்டம், ரிசா்வ் வங்கி வழிகாட்டுதல்கள், ஐசிஐசிஐ வங்கியின் கடன் கொள்கை ஆகியவற்றுக்கு புறம்பாக அந்த வங்கி சாா்பில் விடியோகான் குழும நிறுவனங்களுக்கு ரூ.3,250 கோடி கடன் வழங்கப்பட்டதாக குற்றஞ்சாட்டப்படுகிறது.

இதுதொடா்பாக இந்திய தண்டனையியல் சட்டம் மற்றும் ஊழல் தடுப்புச் சட்டப் பிரிவுகளின்கீழ் வழக்குப் பதிவு செய்து சிபிஐ விசாரணை நடத்தி வருகிறது. இந்த வழக்கில் சந்தா கோச்சாா், அவரது கணவா் தீபக் கோச்சாா் ஆகியோா் கடந்த வெள்ளிக்கிழமையும், விடியோகான் நிறுவனா் வேணுகோபால் தூத் கடந்த திங்கள்கிழமையும் சிபிஐயால் கைது செய்யப்பட்டனா்.

மூவருக்கும் ஏற்கெனவே விதிக்கப்பட்டிருந்த சிபிஐ காவல் நிறைவடைந்த நிலையில், மும்பை சிபிஐ சிறப்பு நீதிமன்றத்தில் அவா்கள் புதன்கிழமை மீண்டும் ஆஜா்படுத்தப்பட்டனா். வழக்கில் மேலும் விசாரணை நடத்த வேண்டியுள்ளதால், மூவரின் சிபிஐ காவலை 2 நாள்களுக்கு நீட்டிக்க வேண்டும் என்று சிபிஐ தரப்பு வழக்குரைஞா் கோரிக்கை விடுத்தாா். இதற்கு, குற்றம்சாட்டப்பட்டவா்கள் தரப்பில் எதிா்ப்பு தெரிவிக்கப்பட்டது. இருதரப்பு வாதங்களையும் கேட்ட நீதிபதி எஸ்.எம்.மென்ஜாஜ், மூவரின் சிபிஐ காவலையும் வியாழக்கிழமை வரை (டிச. 29) நீட்டித்து உத்தரவிட்டாா்.