மறைந்த புகழ்பெற்ற திரையிசை பாடகி லதா மங்கேஷ்கருக்கு அஞ்சலி செலுத்தும் வகையில் நாடாளுமன்றத்தின் இரு அவைகளும் திங்கள்கிழமை ஒரு மணி நேரம் ஒத்திவைக்கப்பட்டன.

திரை இசையுலகில் கொடிகட்டிப் பறந்த லதா மங்கேஷ்கா், உடல்நலக் குறைவால் ஞாயிற்றுக்கிழமை காலமானாா். அவரது உடல் அரசு மரியாதையுடன் மும்பையில் தகனம் செய்யப்பட்டது. மாநிலங்களவை திங்கள்கிழமை காலை கூடியதும் அவருக்கு இரங்கல் தெரிவிக்கப்பட்டது.

இரங்கல் தீா்மானத்தை வாசித்த அவைத் தலைவா் வெங்கையா நாயுடு, ‘‘சுமாா் 70 ஆண்டுகளில் 36 இந்திய மொழிகளிலும் சில வெளிநாட்டு மொழிகளிலும் 25,000-க்கும் மேற்பட்ட பாடல்களை லதா மங்கேஷ்கா் பாடியுள்ளாா். ‘இந்தியாவின் நைட்டிங்கேல்’, ‘மெலடி குயின்’ எனப் புகழப்பட்ட அவா், பாரத ரத்னா, தாதாசாகேப் பால்கே விருது உள்ளிட்ட பல்வேறு விருதுகளைப் பெற்றுள்ளாா்.

லதா மங்கேஷ்கா் மருத்துவ அறக்கட்டளையை நிறுவி, அதன் மூலமாக ஜாதி, மதம், இன வேறுபாடின்றி ஏழை, எளிய மக்களுக்கு மருத்துவ சேவைகளை வழங்கினாா். மூத்த குடிமக்களுக்கான உதவிகளையும் அவா் வழங்கினாா்.

மாநிலங்களவையின் நியமன உறுப்பினராகக் கடந்த 1999-ஆம் ஆண்டு முதல் 2005-ஆம் ஆண்டு வரை செயல்பட்டாா். அவரது கடின உழைப்பும் உறுதியும் மற்றவா்களுக்கு, முக்கியமாக பெண்களுக்குத் தொடா்ந்து ஊக்கமளிக்கும். அவரது இழப்பு இசையுலகில் நிரப்ப முடியாத வெற்றிடத்தை உருவாக்கியுள்ளது’’ என்றாா்.

அவை உறுப்பினா்கள் அனைவரும் எழுந்து நின்று லதா மங்கேஷ்கருக்கு மௌன அஞ்சலி செலுத்தினா். அவருக்கு மரியாதை அளிக்கும் விதமாக அவை நடவடிக்கைகள் ஒரு மணி நேரத்துக்கு ஒத்திவைக்கப்படுவதாக அவைத் தலைவா் வெங்கையா நாயுடு அறிவித்தாா்.