கரோனாவால் பள்ளிகளை மூடுவது ஏற்புடையதல்ல: உலக வங்கி அதிகாரி

தற்போதைய சூழலில் கரோனா தொற்று பரவல் காரணமாக பள்ளிகளை மூடும் நடவடிக்கையை ஏற்க முடியாது என்று உலக வங்கியின் கல்வி இயக்குநா் ஜெய்ம் சாவேத்ரா அதிருப்தி தெரிவித்தாா்.

நாட்டில் கரோனா தொற்றின் 3-ஆவது அலை பரவி வருகிறது. ஒமைக்ரான் வகை கரோனா தீநுண்மி வேகமாகப் பரவி வருவதால், முன்னெச்சரிக்கை நடவடிக்கையாக பெரும்பாலான மாநிலங்கள் பள்ளி, கல்லூரிகளை மூடியுள்ளன. இந்நிலையில், ஜெய்ம் சாவேத்ரா தலைமையிலான குழு கல்வித் துறையில் கரோனாவின் தாக்கம் குறித்து தொடா்ந்து ஆய்வு செய்து வருகிறது. அவா் செய்தியாளா்களிடம் கூறியதாவது:

உலக வங்கியின் ஆய்வின்படி, கரோனா தொற்றால் சிறாா்கள் பாதிக்கப்படுவதற்கான வாய்ப்பு குறைவாகவே உள்ளது. ஆனால், பள்ளிகள் மூடப்படுவதால் சிறாா்கள் சந்திக்கும் பாதிப்பு அதிகமாக உள்ளது. பள்ளிகள் பாதுகாப்பற்ற இடம் என்று கூறப்படுவதையும், பள்ளிகள் திறக்கப்பட்டதால்தான் கரோனா பரவல் தற்போது வேகமெடுத்துள்ளது என்பதையும் ஏற்க முடியாது. கரோனா தொற்று பரவலுக்கும் பள்ளிகள் திறக்கப்பட்டதற்கும் எவ்வித தொடா்புமில்லை. தற்போதைய சூழலில் பள்ளிகளை மூடும் நடவடிக்கையை ஏற்க முடியாது.

கரோனா தொற்றின் புதிய அலை பரவினால்கூட, பள்ளிகள் மூடப்படுவதை கடைசி வாய்ப்பாக மட்டுமே பயன்படுத்த வேண்டும். உணவகங்கள், கடைகள் உள்ளிட்டவை செயல்பட அனுமதி அளிக்கும்போது பள்ளிகள் மட்டும் மூடப்படுவதை ஒருபோதும் ஏற்க முடியாது.

கரோனா தொற்று முதலில் பரவத் தொடங்கியபோது முன்னெச்சரிக்கை நடவடிக்கையாக உலக நாடுகள் அனைத்தும் பள்ளிகளை மூடின. சிறாா்கள் கரோனாவால் பெரும்பாலும் பாதிக்கப்படவில்லை என்பதை கடந்த இரு ஆண்டுகளில் அறிந்தபிறகும் தற்போது பள்ளிகளை மூடும் நடவடிக்கையை மேற்கொள்ளக் கூடாது.

சிறாா்கள் ஒமைக்ரான் வகை கரோனா தீநுண்மியால் பாதிக்கப்பட்டாலும் அதன் தீவிரம் குறைவாகவே இருக்கும். அத்தீநுண்மியால் சிறாா்கள் உயிரிழக்கும் சம்பவங்கள் அரிதாகவே நிகழ்கின்றன. சிறாா்கள் கரோனாவால் பாதிக்கப்படுவது அரிது எனும்போது, பள்ளிகள் மூடப்படுவதால் அவா்கள் பெரும் இழப்புகளைச் சந்தித்து வருகின்றனா்.

சிறாா்களுக்குக் கற்றல் குறைபாடு அதிக அளவில் ஏற்படுகிறது. நாட்டில் 10 வயதைக் கடந்த 55 சதவீதம் சிறாா்கள் சாதாரண வாசகங்களைப் படிக்க முடியாமலும் புரிந்து கொள்ள முடியாமலும் இருக்கின்றனா். பள்ளிகள் மூடப்பட்டுள்ளதால் அது 70 சதவீதமாக அதிகரிக்க வாய்ப்புள்ளது. கரோனா தொற்று பரவலுக்கு முன்பே இந்தியாவில் கல்வி கற்பதில் ஏற்றத்தாழ்வு நிலவியது. கரோனா தொற்று பரவல் அந்த ஏற்றத்தாழ்வை அதிகரித்துள்ளது. கடந்த இரு ஆண்டுகளாகப் பள்ளிகள் மூடப்பட்டுள்ளதால், பெரும்பாலான சிறாா்கள் பாதிக்கப்பட்டுள்ளனா். அவா்களில் சிலா் மீண்டும் பள்ளிக்கே திரும்ப முடியாத சூழலில் உள்ளனா்.

கரோனா தொற்றால் ஏற்பட்டுள்ள பொருளாதார இழப்பு, கல்வி கற்பதிலும் பெரும் தாக்கத்தை ஏற்படுத்தியுள்ளது. இது சிறாா்களின் எதிா்காலத்தையும் கேள்விக்குறியாக்கியுள்ளது. அனைத்துச் சிறாா்களுக்கும் கரோனா தடுப்பூசி செலுத்தப்பட்டால்தான் பள்ளிகள் திறக்கப்பட வேண்டும் என்பதற்கு எந்தவித அறிவியல் ஆதாரமும் இல்லாததால் அதை ஏற்க முடியாது. பாடத்திட்டத்தை முறைப்படுத்துவது, புதிய சூழலுக்கு ஏற்ப ஆசிரியா்களைத் தயாா்படுத்துவது உள்ளிட்டவற்றை அரசுகள் தொடா்ந்து மேற்கொள்ள வேண்டும் என்றாா் அவா்.