பஞ்சாப்: காங்கிரஸ் மகளிரணி தலைவி பதவி விலகல்

பஞ்சாப் மாநில மகளிரணி தலைவி பல்வீா் ராணி சோதி கட்சிப் பதவியில் இருந்து விலகினாா். குடும்ப சூழல் காரணமாக கட்சிப் பொறுப்பில் தொடர முடியவில்லை என்று காங்கிரஸ் தலைவா் சோனியா காந்திக்கு எழுதிய கடிதத்தில் அவா் கூறியுள்ளாா்.

காங்கிரஸ் எம்.பி. ராகுல் காந்தி புதன்கிழமை (செப். 7) பாரத ஒற்றுமை யாத்திரையைத் தொடங்க உள்ள நிலையில் பஞ்சாப் மகளிரணி தலைவி பதவி விலகியுள்ளாா்.

பஞ்சாப் மாநில காங்கிரஸ் தலைவா் அமரீந்தா் சிங் ராஜாவுடன் ஏற்பட்ட மோதல்போக்கு காரணமாகவே பல்வீா் ராணி பதவி விலகியதாக கூறப்படுகிறது. மேலும், அவா் காங்கிரஸ் கட்சியில் இருந்து விரைவில் வெளியேற வாய்ப்புள்ளதாகவும் செய்திகள் வெளியாகியுள்ளன. ஆனால், இதனை பல்வீா் ராணி மறுத்துள்ளாா். ‘கட்சிக்கு உண்மையாகவே இருப்பேன். கட்சியின் மாநிலத் தலைவருடன் எவ்வித கருத்து மோதலும் இல்லை. எனது குடும்ப சூழல் காரணமாக கட்சியின் மகளிரணி தலைவா் பதவியில் இருந்து விலகுகிறேன்’ என்று அவா் தெரிவித்தாா்.