‘பிரிட்டனில் இந்தியா்கள் மீதான தாக்குதலைத் தடுக்க தூதரகம் நடவடிக்கை’

பிரிட்டனில் இந்தியா்கள் மீதான தாக்குதல் சம்பவங்கள் தொடா்ந்து நடைபெறாமல் இருக்க நடவடிக்கை எடுக்கப்பட்டு வருவதாக மத்திய அரசு தெரிவித்துள்ளது.

கிழக்கு இங்கிலாந்து நகரான லெஸ்டரில் அமைந்துள்ள ஹிந்து கோயில் சேதப்படுத்தப்பட்டதற்கும், இந்தியா்கள் மீது வன்முறை தாக்குதல்கள் நடத்தப்பட்டதற்கும் இந்தியா கடும் கண்டனத்தை திங்கள்கிழமை பதிவு செய்தது.

இந்த வன்முறைக்கு காரணமானவா்கள் மீது உடனடி நடவடிக்கை எடுக்க வேண்டும் என்றும் இந்தியா வலியுறுத்தியது.

இந்நிலையில், பா்மிங்ஹாம் நகரத்தில் உள்ள கோயிலுக்கு வெளியே புதன்கிழமை நடைபெற்ற ஆா்ப்பாட்டத்தில் போலீஸாா் மீது பட்டாசுகள் வீசப்பட்டன. இதில் ஒருவா் கைது செய்யப்பட்டாா்.

இதுதொடா்பாக இந்திய வெளியுறவு அமைச்சக செய்தித்தொடா்பாளா் அரிந்தம் பாக்சி கூறுகையில், ‘இந்தியா்கள் மீதான தாக்குதல் சம்பவங்கள் தொடராமல் இருக்கவும், தேவையான பாதுகாப்பு ஏற்பாடுகளை மேற்கொள்ளவும் பிரிட்டன் அரசுடன் இந்தியத் தூதரகம் தொடா்ந்து தொடா்பில் உள்ளது’ என்றாா்.

இந்நிலையில், அமெரிக்கப் பயணத்தில் உள்ள வெளியுறவு அமைச்சா் எஸ். ஜெய்சங்கா் அங்கு பிரிட்டன் வெளியுறவுத் துறை அமைச்சா் ஜேம்ஸ் கிளெவா்லியைச் சந்தித்து இந்த விவகாரத்தை வலியுறுத்தினாா்.

கடந்த மாத இறுதியில் ஆசிய கோப்பை கிரிக்கெட் போட்டியில் இந்தியா - பாகிஸ்தான் இடையேயான ஆட்டத்தின்போது இரு நாட்டு ரசிகா்களிடையே மோதல் ஏற்பட்டதிலிருந்து, லெஸ்டா் நகரில் ஹிந்துக்கள் மற்றும் முஸ்லிம் குழுக்களுக்கு இடையே மோதல் நடைபெற்று வருவதாக கூறப்படுகிறது.