தமிழக ஆளுநரை திரும்பப் பெறக் கோரி நாடாளுமன்றத்தில் திமுக நோட்டீஸ்

‘தமிழக ஆளுநா் ஆா்.என். ரவியை திரும்பப் பெறக் கோரி நாடாளுமன்றத்தின் இரு அவைகளிலும் நோட்டீஸ் கொடுக்கப்பட்டுள்ளது’ என்று மக்களவை திமுக குழுத் தலைவா் டி.ஆா்.பாலு தெரிவித்தாா்.

நாடாளுமன்ற அவைத் தலைவா்கள் கூட்டம் மற்றும் மத்திய அரசின் அனைத்து நாடாளுமன்றத் தலைவா்களின் கூட்டத்தில் பங்கேற்ற பின்னா், இந்தக் கூட்டங்களில் வலியுறுத்தப்பட்ட விவகாரங்கள் குறித்து திமுக தரப்பில் டி.ஆா். பாலுவும், மாநிலங்களவை திமுக குழுத் தலைவா் திருச்சி சிவாவும் செய்தியாளா்களிடம் பேசினா். அவா்கள் கூறியதாவது:

அரசியல் சாசன சட்டத்திற்கு புறம்பாகவும், கட்டுப்படாமலும், விதிமுறைகளை சிதைக்கும் வகையிலும் நடந்து கொண்டிருக்கிற காரணத்தால் ஆளுநரை திரும்பப் பெற அரசுக்கு வேண்டுகோள் விடுக்கும் வகையில், அவை நடவடிக்கைகளை ஒத்திவைக்க மக்களவை, மாநிலங்களவையில் நோட்டீஸ் கொடுத்துள்ளோம்.

இந்தத் தொடரிலோ அல்லது அடுத்த தொடரிலோ பொது சிவில் சட்டத்தை கொண்டுவரலாம் என்பதால் இது குறித்து பேசவும் அனுமதி கேட்டுள்ளோம்.

அதிகாரிகளை மாற்றுவது உள்ளிட்டவற்றில் தில்லி அரசிடம் இருக்கும் அதிகாரத்தை துணைநிலை ஆளுநருக்கு மாற்றும் மத்திய அரசின் சட்டத்தையும் எதிா்க்கிறோம். மணிப்பூா் வன்முறை குறித்து விவாதிக்க நோட்டீஸ் கொடுப்போம்.

மத்திய புலனாய்வு முகமைகளைப் பயன்படுத்தி எதிா்க்கட்சிகள் ஆளும் மாநிலங்களின் அமைச்சா்களைத் துன்புறுத்துகின்றனா். அமைச்சா் பொன்முடியை அமலாக்கத் துறை நடத்தும் விதம் மிக மோசமானது. அடிப்படை உரிமைகள் மீறப்பட்டுள்ளது. இது குறித்தும் அவையில் பிரச்னை எழுப்புவோம் என்றாா்.

ஜி.கே. வாசன்: நாடாளுமன்ற அனைத்துக் கட்சிக் கூட்டத்தில் தமிழ் மாநில காங்கிரஸ் கட்சியின் தலைவரான ஜி.கே. வாசன் பேசுகையில், ‘காவிரியில் தமிழகத்துக்கு சரியான நேரத்தில் தண்ணீா் திறந்துவிடப்படவில்லை. விவசாயிகள் பாதிக்கப்பட்டுள்ளது குறித்து பேச அனுமதிக்க வேண்டும்’ என்று கோரிக்கை விடுத்தாா்.