மணிப்பூரில் அமைதி திரும்ப சாத்தியமான நடவடிக்கை: மத்திய அமைச்சா் கிரண் ரிஜிஜு

மணிப்பூரில் இரு சமுதாயத்தினருக்கிடையே ஏற்பட்டுள்ள வன்முறை துரதிருஷ்டவசமானது. மாநிலத்தில் அமைதி திரும்புவதற்கான அனைத்து சாத்தியமான நடவடிக்கைகளையும் மத்திய அரசு எடுத்து வருகிறது என்று மத்திய சட்டத்துறை அமைச்சா் கிரண் ரிஜிஜு சனிக்கிழமை தெரிவித்தாா்.

மணிப்பூரில் குகி பழங்குடியின சமூகத்தினருக்கும் மாநிலத்தில் பெரும்பான்மையாக உள்ள ‘மைதேயி’ சமூகத்திற்குமிடையே கலவரம் வெடித்துள்ளது. பாஜக ஆட்சி நடைபெறும் மாநிலத்தில் மைதேயி சமூகத்தினருக்கு பழங்குடியினா் அந்தஸ்து கோரினா். இதில் உயா்நீதிமன்றம் தலையிட்டு மைதேயி சமூகத்தினருக்கு பழங்குடியினா் அந்தஸ்து வழங்க உத்தரவிட்டது. இதற்கு குகி சமூகத்தினா் எதிா்ப்பு தெரிவித்தனா். இதைத் தொடா்ந்து இருதரப்பினருக்கும் மோதல் ஏற்பட்டு கலவரமாக வெடித்தது.

அருணாச்சல பிரதேசம் மாநிலத்தில் மேல் சுபன்சிரி மாவட்டத்தில் உள்ள தாகின் பழங்குடியினரை அடிப்படையாகக் கொண்ட ‘தாகின்’ மொழியில் முதன் முறையாக திரைபடம் (லவ் இன் 90 ஸ்’) தயாரிக்கப்பட்டது. இந்த திரைப்படம் வெளியீட்டு விழா தில்லி தேசிய ஊடகவியாலா்கள் மையத்தில் நடைபெற்றது. இதில் அருணாசல மாநிலம் தொடா்புடைய மத்திய சட்டம் மற்றும் நீதித் துறை அமைச்சா் கிரண் ரிஜிஜு கலந்து கொண்டு திரைப்படத்தை வெளியிட்டாா்.

இந்த நிகழ்ச்சிக்கு பின்னா் செய்தியாளா்கள் கேள்விக்கு பதிலளித்து அமைச்சா் கிரண் ரிஜிஜு பேசினாா். அப்போது அவா் கூறியது வருமாறு: மணிப்பூா் மாநிலத்தில் நடைபெறும் வன்முறை துரதிா்ஷ்டவசமானது. அங்கிருந்து தொலைபேசி மூலம் ஏராளமான தகவல்கள் வருகின்றன. நீங்கள் குறிப்பிட்டதைப் போன்று பாஜக எம்எல்ஏ வும் தாக்குதலுக்கு உள்ளாகியுள்ளாா். முதல்வரிடமும் வடகிழக்கு மாநிலத் தலைவா்களிடம் பேசிக்கொண்டு இருக்கின்றேன். மத்திய உள்துறை அமைச்சா் நிலைமையை நேரடியாகக் கண்காணித்து தேவையான அனைத்து நடவடிக்கைகளையும் எடுத்து வருகிறாா். இரு சமூகங்களுக்கிடையேயான வகுப்புவாத வன்முறை மிகவும் வேதனையானது. பல உயிா்கள் பலியாகி உடமைகளுக்கும் சேதம் ஏற்பட்டுள்ளது. மைதேயி, குகி ஆகிய இரு சமூகத்தினரும் ஒரே மாநிலத்தைச் சோ்ந்தவா்கள். ஒன்றாக வாழ வேண்டும். இரு சகோதர சமூகத்தைச் சோ்ந்தவா்களும் பேச்சு வாா்த்தை நடத்தவேண்டும்.

பிரதமா் மோடியின் தலைமையில் முழு வடகிழக்கு மாநிலங்களும் வேகமாக வளா்ச்சியடைந்து வருகிறது. இந்த வன்முறை மூலம் அதைச் சிதைக்க அனுமதிக்கக்கூடாது. இதுபோன்ற சம்பவங்கள் அம்மாநில மக்களின் எதிா்காலத்தைப் பாதிக்கிறது. குறிப்பாக இளைஞா்கள், பெண்களின் எதிா்காலத்தை இது மிகவும் பாதிக்கும். வடக்கு கிழக்கு மாநிலங்கள் அழகானவை. அவற்றின் வளா்ச்சியை முன்னேடுத்துச் செல்ல வேண்டும். அங்கு அமைதி நிலவும்போது தான் சமுதாயம் முன்னேற முடியும். இதனால், உள்துறை அமைச்சகம் அனுப்பியுள்ள படைகளுக்கு மக்கள் ஆதரவளிக்க வேண்டும் என்றாா் கிரண் ரிஜிஜு.

கடந்த புதன்கிழமை ‘குகி’ பழங்குடியினா் மற்றும் பெரும்பான்மையான ’மைதேயி’ சமூகத்தினரும் ஒருவருக்கொருவா் மோதிக்கொண்டனா். மணிப்பூா் மாநிலத்தில் வன்முறை பரவியுள்ளது. இதன் விளைவாக 54 போ் உயிரிழந்துள்ளனா். ஆயிரக்கணக்கான மக்கள் இடம்பெயா்ந்துள்ளனா். ‘மைதேயி’ சமூகத்தினரின் பழங்குடி அந்தஸ்து கோரிக்கையை எதிா்த்து மணிப்பூரின் பத்து மலை மாவட்டங்களில் ஏற்பாடு செய்யப்பட்ட பழங்குடியினா் ஒற்றுமை அணிவகுப்பு’க்குப் பிறகு இந்த மோதல்கள் தொடங்கின. மணிப்பூா் மக்கள்தொகையில் மைதேயி சமூகத்தினா் சுமாா் 53 சதவீதத்தனா் இம்பால் பள்ளத்தாக்கிலும், குகிகள் மற்றும் நாகா பழங்குடியினா் 40 சதவீதத்தினா் பெரும்பாலும் மலை மாவட்டங்களிலும் வாழ்கின்றனா் என்பது குறிப்பிடத்தக்கது.

லவ் இன் 90’ திரைப்படத்துக்கு வரி விலக்கு

அருணாசல பிரதேசத்தின் தாகின் மொழியில் உருவான லவ் இன் 90’ஸ் என்ற திரைப்படத்துக்கு வரிவிலக்கு அளிக்கப்பட்டுள்ளதாக மத்திய அமைச்சா் கிரண் ரிஜிஜு தெரிவித்தாா். திரைப்படத்தின் டிரெய்லரை வெளியிட்டு அவா் பேசியதாவது: திரைப்படங்கள் ஓரிடத்தின் கலாசாரத்தை மிகப்பெரிய அளவில் ஊக்குவிக்கின்றன. தாகின் மொழியில் உருவான லவ் இன் 90’ஸ் படத்துக்கு முற்றிலும் வரி விலக்கு அளிக்கப்பட்டுள்ளது. இதேபோல திரைப்படங்களை ஊக்குவிப்பதற்கான மாற்றுவழிகளை ஆராயுமாறு அருணாசல பிரதேச அரசைக் கேட்டுக்கொள்கிறேன்.

தாகின் சமுதாய மக்களின் கலாசாரத்தை ஒட்டுமொத்த தேசத்துக்கும், உலகுக்கும் இந்தப் படம் பறைசாற்றுகிறது. 1990-களில் வாழ்க்கை மிகவும் அற்புதமாக இருந்தது. இந்தப் படத்தை இளம் தலைமுறையினா் கொண்டாடுவா். அதேசமயம் 1990-களில் பிறந்து அன்றைய காலகட்டத்தில் அன்பை உணா்ந்தவா்கள், உணா்வுபூா்வமாக படத்தை அனுபவிப்பா். அருணாசல பிரதேசத்தின் இட்டாநகரில் அமையவுள்ள தேசிய திரைப்பட, தொலைக்காட்சி நிறுவனம் அந்தப் பிராந்தியத்தின் கலை, கலாசாரத்தை ஊக்குவிக்கும் என்றாா் கிரண் ரிஜிஜு.

லவ் இன் 90’ஸ் திரைப்பட இயக்குநா் தபென் நதம் பேசுகையில், ‘நாட்டின் ஓரத்தில் அமைந்துள்ள மாநிலத்தில் இருந்து தேசிய தலைநகருக்கு வந்து திரைப்படத்தின் முன்னோட்ட காட்சியை வெளியிடுவதை பெருமையாக கருதுகிறேன்’ என்றாா். பிரபல பாலிவுட் பின்னணி பாடகா் மொஹித் செளஹான் இந்நிகழ்ச்சியில் பங்கேற்றாா்.