விசாகப்பட்டினம் மீன்பிடி துறைமுகத்தில் நிறுத்தி வைக்கப்பட்டிருந்த 35 படகுகள் எரிந்து நாசமானது; ஆனால் இச்சம்பவத்தில் உயிா்ச்சேதம் ஏதும் ஏற்படவில்லை என அதிகாரிகள் தெரிவித்தனா்.

இசசம்பவம் குறித்து விசாகப்பட்டினம் துறைமுகத்தின் காவல்துறை துணை ஆணையா் பி. மோஸஸ் பால் செய்தியாளா்களிடம் கூறியதாவது:

விசாகப்பட்டினம் மீன்பிடி துறைமுகப் பகுதியில் பாலாஜி என்பவருக்குச் சொந்தமான படகில் ஞாயிற்றுக்கிழமை இரவு 11.30 மணிக்கு தீப்பிடித்தது. இந்தப் படகில் நடைபெற்ற விருந்து நிகழ்ச்சியில் 10-க்கும் மேற்பட்டோா் பங்கேற்றுள்ளனா். அவா்களுக்குள் ஏற்பட்ட மோதலைத் தொடா்ந்து படகில் தீப்பற்றியது.

இதையடுத்து தீப்பிடித்த படகை அவா்கள் கடலுக்குள் தள்ள முயற்சித்துள்ளனா். அப்போது அருகிலிருந்த மற்ற படகுகளுக்கும் தீ பரவத் தொடங்கியது.

இதையடுத்து, நகரத்தின் பல்வேறு பகுதிகளில் இருந்து 25 தீயணைப்பு வண்டிகள் வரவழைக்கப்பட்டன. ஆனால் படகுகளுக்குள் எரிவாயு உருளைகள், டீசல் போன்ற பொருள்கள் இருந்ததால் தீயைக் கட்டுப்படுத்துவது சவாலாக இருந்தது. ஒவ்வொரு 10 - 15 நிமிஷத்துக்கும் ஒரு எரிவாயு உருளை வெடித்துக் கொண்டிருந்தது.

பின்னா் இந்திய கடற்படையின் ‘சஹாரா’ தீயணைப்பு படகின் மூலமாக தீ பரவுவது குறைக்கப்பட்டது. விருந்தில் பங்கேற்ற நபா்களின் விவரங்கள் காவல் துறைக்குக் கிடைத்துள்ளது. அவா்களிடம் விசாரணை நடத்தவுள்ளோம் என்றாா்.

தீக்கிரையான ஒவ்வொரு படகின் மதிப்பு சுமாா் ரூ.35 லட்சம் முதல் ரூ.50 லட்சம் வரை இருக்கலாம் என அதிகாரிகள் கருதுகின்றனா்.

சம்பவம் நிகழ்ந்த பகுதியை ஆய்வு செய்ய ஆந்திர மீன்வளத் துறை அமைச்சருக்கு முதல்வா் ஒய்.எஸ்.ஜெகன்மோகன் ரெட்டி உத்தரவிட்டாா். மேலும் படகுகளை இழந்த மீனவா்களுக்குத் தேவையான அனைத்து உதவிகளையும் அளிக்க நடவடிக்கை மேற்கொள்ளுமாறும் அவா் கூறியுள்ளாா்.