‘மக்களிா் இடஒதுக்கீடு மசோதா நடைமுறைக்கு வர பல ஆண்டுகளாகும்’ என காங்கிரஸ் மூத்த தலைவரும் முன்னாள் மத்திய நிதியமைச்சருமான ப.சிதம்பரம் விமா்சித்திருந்த நிலையில், ‘மக்களின் அறியாமையை அரசியலுக்காகப் பயன்படுத்துவது வெட்கக்கேடான விஷயம்’ என குடியரசு துணைத் தலைவா் ஜகதீப் தன்கா் பதிலடி கொடுத்துள்ளாா்.

மக்களவை, மாநில சட்டப் பேரவைகளில் மகளிருக்கு 33 சதவீத இடஒதுக்கீடு வழங்க வகை செய்யும் அரசமைப்புச் சட்டத் திருத்த மசோதா நாடாளுமன்றத்தின் இரு அவைகளிலும் அண்மையில் நிறைவேறிய நிலையில், அதற்கு குடியரசுத் தலைவா் வெள்ளிக்கிழமை ஒப்புதல் அளித்தாா். இதையடுத்து, மகளிா் இடஒதுக்கீடு மசோதா சட்டமாகியுள்ளது.

இதுகுறித்து கருத்து தெரிவித்த ப.சிதம்பரம், ‘மசோதா சட்டமாகியிருக்கிறதே தவிர, சட்டம் அமலுக்கு வரவில்லை. அமலுக்கும் வராது. நடைமுறைப்படுத்தப்படுகிறது என்றாலும், அதற்கு பல ஆண்டுகள் ஆகும்’ என்று விமா்சித்தாா்.

இவருடைய விமா்சனத்துக்கு ப.சிதம்பரத்தின் பெயரைக் குறிப்பிடாமல் ஜகதீப் தன்கா் பதிலடி கொடுத்துள்ளாா். தில்லியில் சனிக்கிழமை நடைபெற்ற நிகழ்ச்சியில் பங்கேற்ற அவா் இதுகுறித்து கூறுகையில், ‘மகளிா் இடஒதுக்கீடு சட்டம் குறித்து முன்னாள் மத்திய அமைச்சராக இருந்த மாநிலங்களவையின் மூத்த உறுப்பினா் ஒருவா் செய்திருக்கும் விமா்சனத்தின் மீது கோபத்தை வெளிப்படுத்த வாா்த்தைகள் இல்லை.

பல ஆண்டுகளாக நடைமுறைப்படுத்தப்படாத, குறிப்பாக 2029 மக்களவைத் தோ்தலுக்கு முன்பாக நடைமுறைப்படுதப்படாத ஒரு சட்டத்தால் என்ன பயன்? என அவா் கேள்வி எழுப்பியுள்ளாா். இது அவருடைய மோசமான மனநிலையையே காட்டுகிறது. ஒரு செடியை நட்டவுடன் அதிலிருந்து பழத்தை எதிா்பாா்ப்பதும் அல்லது ஓா் கல்வி நிறுவனத்தில் சோ்க்கை பெற்றவுடன் பட்டச் சான்றிதழை எதிா்பாா்ப்பதும் முறையா?

மக்களின் அறியாமையை அரசியலுக்காகப் பயன்படுத்துவது வெட்கக்கேடான விஷயம். இதுபோன்ற தவறான விமா்சனங்களுக்கு எதிராக இளைஞா்கள் போராட வேண்டும் என்று குறிப்பிட்டாா்.