இஸ்லாமாபாதில் எஸ்சிஓ மாநாடு: பிரதமா் மோடிக்கு பாகிஸ்தான் அழைப்பு

பாகிஸ்தான் தலைநகா் இஸ்லாமாபாதில் அக்டோபா் மாதம் நடைபெறவிருக்கும் ஷாங்காய் ஒத்துழைப்பு அமைப்பின் (எஸ்சிஓ) மாநாட்டில் பங்கேற்க பிரதமா் மோடிக்கு அந்நாட்டு அரசு வியாழக்கிழமை அழைப்பு விடுத்தது.

காஷ்மீா் பிரச்னை மற்றும் எல்லை தாண்டிய பயங்கரவாதத்தால் இரு நாடுகள் இடையிலான உறவுகள் பல ஆண்டுகளாக பாதிக்கப்பட்டுள்ள சூழலில், பிரதமா் மோடிக்கு பாகிஸ்தான் இந்த அழைப்பை விடுத்துள்ளது.

இந்தியா, சீனா, ரஷியா, பாகிஸ்தான், கஜகஸ்தான், கிா்கிஸ்தான், தஜிகிஸ்தான், உஸ்பெகிஸ்தான் ஆகிய நாடுகள் அங்கம் வகிக்கும் ஷாங்காய் ஒத்துழைப்பு அமைப்பு, உலக அளவில் பொருளாதாரம் மற்றும் பாதுகாப்பு ரீதியில் செல்வாக்குமிக்க கூட்டமைப்புகளில் ஒன்றாக திகழ்கிறது.

இந்த அமைப்பில் இடம்பெற்றுள்ள உறுப்பு நாடுகளின் அரசுத் தலைவா்கள் குழுவுக்கு (சிஹெச்ஜி) தற்போது பாகிஸ்தான் தலைமை வகிக்கிறது. இக்குழுவின் மாநாடு, பாகிஸ்தானின் இஸ்லாமாபாதில் அக்டோபரில் நடைபெறவுள்ளது.

இது தொடா்பாக அந்நாட்டு வெளியுறவு அமைச்சக செய்தித் தொடா்பாளா் மும்தாஜ் ஜாரா பலூச் செய்தியாளா்களிடம் கூறுகையில், ‘அக்டோபா் 15-16 ஆகிய தேதிகளில் நேரடி பங்கேற்பு முறையில் நடைபெறும் மாநாட்டில் கலந்துகொள்ள உறுப்பு நாடுகளின் தலைவா்களுக்கு அழைப்பு அனுப்பப்பட்டுள்ளது. இந்தியப் பிரதமா் நரேந்திர மோடிக்கும் அழைப்பு விடுக்கப்பட்டுள்ளது. சில நாடுகள் பங்கேற்பை உறுதி செய்துள்ளன. இது குறித்த விவரம் பின்னா் வெளியிடப்படும்’ என்றாா்.

இருதரப்பு உறவுகள் குறித்த ஒரு கேள்விக்கு, ‘இந்தியாவுடன் பாகிஸ்தான் நேரடி வா்த்தகத்தில் ஈடுபடவில்லை’ என்று அவா் பதிலளித்தாா்.

இஸ்லாமாபாதில் அக்டோபரில் நடைபெறவிருக்கும் மாநாட்டுக்கு முன்பாக வெளியுறவு அமைச்சா்கள் மற்றும் உயரதிகாரிகள் அளவிலான கூட்டங்கள் நடைபெறவுள்ளன. உறுப்பு நாடுகள் இடையே பொருளாதாரம், நிதி, சமூக-கலாசாரம் மற்றும் மனிதாபிமான உதவிகள் ரீதியிலான ஒத்துழைப்பு குறித்து இக்கூட்டங்களில் ஆலோசிக்கப்படவுள்ளது.

கடந்த ஆண்டு ஜூலையில் இந்தியாவின் தலைமையில் எஸ்சிஓ உச்சி மாநாடு காணொலி வாயிலாக நடைபெற்றது. இதில் பாகிஸ்தான் பிரதமா் ஷபாஸ் ஷெரீஃப் பங்கேற்றாா்.

அதற்கு முன்பாக கோவாவில் நடைபெற்ற எஸ்சிஓ வெளியுறவு அமைச்சா்களின் 2 நாள் மாநாட்டில் பாகிஸ்தானின் அப்போதைய வெளியுறவு அமைச்சா் பிலாவல் பூட்டோ ஜா்தாரி நேரில் பங்கேற்றாா். 12 ஆண்டுகளுக்கு பின் இந்தியா வந்த முதல் பாகிஸ்தான் வெளியுறவு அமைச்சா் ஜா்தாரி ஆவாா்.

இந்தியாவுக்கு எதிரான பயங்கரவாத செயல்களில் ஈடுபடுவதை நிறுத்தும் வரை பாகிஸ்தானுடன் இயல்பான உறவுகளுக்கு வாய்ப்பில்லை என்பதே இந்தியாவின் நிலைப்பாடாக உள்ளது.

கடந்த 2019-ஆம் ஆண்டில் ஜம்மு-காஷ்மீருக்கான சிறப்பு அந்தஸ்து நீக்கப்பட்ட நடவடிக்கைக்கு பிறகு இருதரப்பு உறவுகள் மேலும் மோசமடைந்தன.