மாணவா்கள் மத்தியில் தற்கொலை அதிகரிப்பு: ராகுல் கவலை

மாணவா்கள் மத்தியில் தற்கொலைச் சம்பவங்கள் அதிகரித்து வருவதாக, மக்களவை எதிா்க்கட்சித் தலைவா் ராகுல் காந்தி கவலை தெரிவித்துள்ளாா்.

மேலும், ‘மாணவா்களின் பாதையில் தடைகளை ஏற்படுத்துவதற்கு பதிலாக அவா்களுக்கான ஆதரவை அரசு உறுதிசெய்ய வேண்டும்’ என்றும் அவா் வலியுறுத்தினாா்.

இது தொடா்பாக ராகுல் காந்தி சனிக்கிழமை வெளியிட்ட எக்ஸ் பதிவில் கூறியிருப்பதாவது:

நாட்டில் கடந்த 10 ஆண்டுகளில் 0-24 வயதுடையவா்களின் எண்ணிக்கை 58.2 கோடியில் இருந்து 58.1 கோடியாக குறைந்துள்ளது. இந்த காலகட்டத்தில் தற்கொலை செய்துகொண்ட மாணவா்களின் எண்ணிக்கை 6,654-இல் இருந்து 13,044-ஆக அதிகரித்துள்ளது.

உலக அளவில் இளைஞா்களை அதிகம் கொண்ட நாடாக இந்தியா உள்ளது. ஆனால், இளைஞா்களுக்கு உரிய வசதிகள் வழங்கப்படவில்லை. மாறாக, அவா்கள் சிரமங்களையும் நிா்பந்தங்களையும் எதிா்கொண்டு வருவது துரதிருஷ்டவசமானது. இது, சமூக-பொருளாதார-உளவியல் ரீதியில் மிக மோசமான பிரச்னைகளை நோக்கி அவா்களை இட்டுச் செல்கிறது.

வேலையில்லா திண்டாட்டம் அதிகரிப்பு, வினாத்தாள் கசிவுகள், கல்வித் துறையில் ஊழல், கல்விக்கான செலவு அதிகரிப்பு, சமூக ஒடுக்குமுறை, பொருளாதார சமநிலையின்மை, பெற்றோா்களின் அழுத்தம் போன்ற எண்ணற்ற பிரச்னைகளுக்கு இடையே வெற்றிக்காக மாணவா்கள் போராடுகின்றனா்.

இளைஞா்கள் மற்றும் மாணவா்களின் பாதையில் தடைகளை ஏற்படுத்துவதற்கு பதிலாக அவா்களின் சிரமங்களைக் குறைப்பதற்கான ஆதரவை நல்க வேண்டுமென மத்திய அரசிடம் எதிா்பாா்க்கிறேன்.

மாணவா்களுக்கு மனரீதியான ஆதரவை வழங்குமாறு பெற்றோா்களுக்கு வேண்டுகோள் முன்வைக்கிறேன். நாட்டின் இளைஞா்கள், தங்களின் பிரச்னைகளுக்கு எதிராக குரலெழுப்புவதோடு, கேள்விகளை எழுப்ப வேண்டும். எதற்கும் அஞ்சாமல், உரிமைகளைக் கோர வேண்டும். நான் உங்களுக்கு துணைநிற்பேன். உங்களின் உரிமைகளுக்காக நாடாளுமன்ற வீதிகளில் தொடா்ந்து போராடுவேன் என்றாா் அவா்.

தேசிய குற்ற ஆவண காப்பக தரவுகளின்படி, நாட்டில் மாணவா்கள் தற்கொலை விகிதம் அதிகரித்து வருவதாக வெள்ளிக்கிழமை ஊடக செய்தி வெளியான நிலையில், ராகுல் இவ்வாறு பதிவிட்டுள்ளாா்.