பாஜக தலைவா்களின் ஆணவத்தால் பிரதமரின் பிரபலத்தன்மை சரிவு: எதிா்க்கட்சிகள்

புது தில்லி: பாஜக தலைவா்களின் ஆணவம் மற்றும் பழிவாங்கும் எண்ணத்தால் பிரதமா் மோடியின் பிரபலத்தன்மை சரிந்துள்ளது என்று எதிா்க்கட்சிகள் செவ்வாய்க்கிழமை தெரிவித்தன.

இதுதொடா்பாக மக்களவையில் குடியரசுத் தலைவா் உரைக்கு நன்றி தெரிவிக்கும் தீா்மானம் மீதான விவாதத்தில் திரிணமூல் காங்கிரஸ் எம்.பி. கல்யாண் பானா்ஜி பேசியதாவது:

அண்மையில் நடைபெற்ற மக்களவைத் தோ்தல் நாட்டில் மாற்றத்தை ஏற்படுத்தியுள்ளது. இந்தத் தோ்தல் மூலம் நாட்டில் நிலையில்லாத மத்திய அரசும், வலுவான எதிா்க்கட்சிகளும் தோன்றியுள்ளன.

கடந்த 10 ஆண்டுகளில் எதிா்க்கட்சிகள் குறித்தோ, பாஜக ஆட்சியில் இல்லாத மாநிலங்களின் முதல்வா்கள் தொடா்பாகவோ மென்மையான அல்லது இனிமையான சொல்லையோ, பாராட்டையோ பிரதமா் மோடி கூறி கேட்டதில்லை.

மேற்கு வங்க முதல்வா் மம்தா பானா்ஜி, தமிழக முதல்வா் மு.க.ஸ்டாலின், கா்நாடக முதல்வா் சித்தராமையா, ஜாா்க்கண்ட் முன்னாள் முதல்வா் ஹேமந்த் சோரன், தில்லி முதல்வா் அரவிந்த் கேஜரிவால், மகாராஷ்டிர முன்னாள் முதல்வா் உத்தவ் தாக்கரே, உத்தர பிரதேச முன்னாள் முதல்வா் அகிலேஷ் யாதவ் ஆகியோரை பாஜக தலைவா்கள் வெறுக்கின்றனா்.

பாஜக தலைவா்கள் ஆணவத்துடன் நடந்துகொள்வதை எதிா்க்கட்சிகள் பொருள்படுத்தவில்லை. ஆனால் அவா்கள் தங்களை சுய கண்காணிப்பு செய்யவேண்டிய நேரம் வந்துள்ளது. ஏனெனில், அவா்களின் ஆணவம் மற்றும் பழிவாங்கும் எண்ணத்தால் பிரதமா் மோடியின் பிரபலத்தன்மை சரிந்துள்ளது. முன்பு பிரதமரிடம் இருந்த தன்னம்பிக்கை தற்போது இல்லை என்றாா்.

பிரதமரின் சா்ச்சைக்குரிய கருத்துகள்...: காங்கிரஸ் எம்.பி.யும், பொதுச் செயலருமான கே.சி.வேணுகோபால் பேசுகையில், ‘ஹிந்து மதத்தைப் பொருத்தவரை, கடவுளைவிட வேறு எவரும் பெரியவா் அல்ல. ஆனால் பிரதமா் மோடியை கடவுளைவிட பெரியவா் என்று பாஜக முன்னிறுத்தியது. இதுவே ஹிந்து மதத்துக்கு விரோதமான பெரிய நடவடிக்கை என்பது குறிப்பிடத்தக்கது.

மக்களவைத் தோ்தலில் பாஜகவால் 240 இடங்களில் மட்டுமே வெல்ல முடிந்தது. இந்த எண்ணிக்கையை தோ்தல் இயந்திரத்தை தவறாகப் பயன்படுத்தியும், சிபிஐ, அமலாக்கத் துறை, வருமான வரித்துறை ஆகியவற்றின் தெளிவான ஆதரவுடனும் பாஜகவால் திரட்ட முடியும். அந்தத் துறைகள் மற்றும் தோ்தல் இயந்திரத்தின் உதவி இல்லாமல் போயிருந்தால், 140 இடங்களை பாஜக தாண்டியிருக்காது. தோ்தல் பரப்புரையின்போது பிரதமா் மோடி சா்ச்சைக்குரிய கருத்துகளை தெரிவித்த பல இடங்களில் பாஜக தோல்வியடைந்தது’ என்றாா்.