புல்டோசா் நடவடிக்கை: நகராட்சி கவுன்சில் பதிலளிக்க உச்சநீதிமன்றம் உத்தரவு
மகாராஷ்டிர மாநிலம் சிந்துதுா்க் மாவட்டத்தைச் சோ்ந்த ஒருவரின் வீடு இடிக்கப்பட்ட விவகாரத்தில் அந்த நகராட்சி நிா்வாகம் பதிலளிக்குமாறு உச்சநீதிமன்றம் திங்கள்கிழமை உத்தரவிட்டது.
புது தில்லி: சாம்பியன்ஸ் டிராஃபி தொடரின்போது இந்தியா-பாகிஸ்தான் மோதிய ஆட்டத்தில் இந்தியாவுக்கு எதிராக முழக்கங்கள் எழுப்பிய குற்றச்சாட்டில், மகாராஷ்டிர மாநிலம் சிந்துதுா்க் மாவட்டத்தைச் சோ்ந்த ஒருவரின் வீடு இடிக்கப்பட்ட விவகாரத்தில் அந்த நகராட்சி நிா்வாகம் பதிலளிக்குமாறு உச்சநீதிமன்றம் திங்கள்கிழமை உத்தரவிட்டது.
முன்னதாக, வீடு உள்பட சொத்துகளை இடிக்கும் முன் சம்பந்தப்பட்ட நபருக்கு 15 நாள்களுக்கு முன்பு நோட்டீஸ் அனுப்ப வேண்டும் உள்பட பல்வேறு வழிமுறைகளை வெளியிட்டு கடந்த ஆண்டு நவம்பா் மாதம் உச்ச நீதிமன்றம் தீா்ப்பளித்தது.
அதை அவமதிக்கும் வகையில் இந்த நடவடிக்கையை மேற்கொண்ட சிந்துதுா்க் மாவட்டத்தில் உள்ள மால்வான் நகராட்சி கவுன்சில் நிா்வாகம் செயல்பட்டுள்ளதால், அதன் மீது நீதிமன்ற அவமதிப்பு நடவடிக்கை எடுக்க வேண்டும் என மனுதாரரான கித்தாபுல்லா ஹமிதுல்லா கான் என்பவா் வழக்குரைஞா் மூலம் மனுதாக்கல் செய்துள்ளாா்.
Advertisement
அவா் தாக்கல் செய்த மனுவில் மேலும் கூறப்பட்டிருப்பதாவது: அண்மையில் நடைபெற்ற கிரிக்கெட் தொடரை (இந்தியா-பாகிஸ்தான்) தொலைக்காட்சியில் பாா்த்துக்கொண்டிருந்த மனுதாரரும் அவரது மகனும் இந்தியாவுக்கு எதிராக முழக்கமிட்டனா். மனுதாரரின் நண்பா் இந்த சம்பவம் குறித்து காவல் துறையில் புகாா் அளித்தாா். அதனடிப்படையில் மனுதாரரையும் அவரது மகனையும் அன்றிரவே (பிப்.23) காவல் நிலையத்துக்கு போலீஸாா் அழைத்து சென்றனா். பின் 4 முதல் 5 மணி நேரம் கழித்து அவரது மகனை வீட்டுக்கு அனுப்பிவிட்டனா். ஆனால் மனுதாரா் மற்றும் அவரது மனைவியை போலீஸாா் கைது செய்து சிறைக்கு அனுப்பினா். இதனிடையே கடந்த பிப்ரவரி 24-ஆம் தேதி மனுதாரருக்குச் சொந்தமான சிறிய கடை மற்றும் வீடு சட்டவிரோதமாக கட்டப்பட்டதாகக் கூறி அதை மால்வான் நகராட்சி கவுன்சில் அதிகாரிகள் இடித்து தரைமட்டமாக்கினா். அதேபோல் மனுதாரரின் வாகனத்தையும் சேதப்படுத்தினா். அதன்பின் பிப்ரவரி 25-ஆம் தேதி மனுதாரா் மற்றும் அவரது மனைவிக்கு நீதிமன்றம் ஜாமீன் வழங்கிய நிலையில் அவா்கள் இருவரும் விடுவிக்கப்பட்டனா்.
வசிப்பிடம் அடிப்படை உரிமை:
மனுதாரா் மற்றும் அவரது குடும்பத்தினரை குற்றவாளிகள்போல் சித்தரித்து இடைப்பட்ட காலத்தில் அவா்களது வீட்டை நகராட்சி அதிகாரிகள் திட்டமிட்டு இடித்துள்ளது இதன் மூலம் உறுதியாகியுள்ளது.
வசிப்பிட உரிமை என்பது சட்டப்பிரிவு 21-இன்கீழ் அரசமைப்புச் சட்டம் வழங்கியுள்ள அடிப்படை உரிமையாகும். இதை பல்வேறு தீா்ப்புகளில் நீதிமன்றமும் உறுதிப்படுத்தியுள்ளது.
இந்த விவகாரத்தில் சட்ட விதிகளை பின்பற்றாமல் அதிகாரிகள் தன்னிச்சையாக நடவடிக்கை எடுத்துள்ளனா்.
எனவே, மனுதாரரின் சொத்துகளை மீண்டும் அவரிடம் ஒப்படைத்து உரிய இழப்பீட்டை வழங்க வேண்டும். அதேசமயம் உச்ச நீதிமன்ற தீா்ப்பை மீறி செயல்பட்ட அதிகாரிகளை கைது செய்து நடவடிக்கை எடுக்குமாறும் கேட்டுக் கொள்கிறோம் என தெரிவிக்கப்பட்டது.
இந்த மனுவை விசாரித்த உச்ச நீதிமன்ற நீதிபதிகள் பி.ஆா்.கவாய் மற்றும் அகஸ்டின் ஜாா்ஜ் மாசி ஆகியோா் அடங்கிய அமா்வு இதுகுறித்து மால்வான் நகராட்சி கவுன்சில் நிா்வாகம் பதிலளிக்குமாறு உத்தரவிட்டனா். மேலும் இந்த வழக்கை நான்கு வாரங்களுக்கு ஒத்திவைத்தனா்.
இருப்பினும், சாலைகள், தெருக்கள், நடைபாதைகள், ரயில்வே தண்டவாளங்கள், நதி அல்லது நீா் தேக்கங்களை ஆக்கிரமித்து கட்டப்பட்டுள்ள கட்டடங்களை இடிப்பது தாங்கள் வெளியிட்டுள்ள விதிமுறைக்கு உட்படாது எனவும் தனது தீா்ப்பில் உச்ச நீதிமன்றம் தெரிவித்துள்ளது குறிப்பிடத்தக்கது.