அயோத்தி ராமா் கோயிலில் குடியரசுத் தலைவா் முா்மு வழிபாடு

உத்தர பிரதேச மாநிலம் அயோத்தியில் உள்ள புகழ்பெற்ற ராமா் கோயிலில் குடியரசுத் தலைவா் திரெளபதி முா்மு வியாழக்கிழமை வழிபாடு நடத்தினாா்.

விமானம் மூலம் அயோத்திக்குச் சென்ற குடியரசுத் தலைவா் திரெளபதி முா்முவை மாநில ஆளுநா் ஆனந்திபென் படேல், முதல்வா் யோகி ஆதித்யநாத், துணை முதல்வா்கள் கேசவ் பிரசாத், பிரஜேஷ் பாடக் ஆகியோா் விமான நிலையத்தில் வரவேற்றனா். பின்னா் குடியரசுத் தலைவா் அயோத்தி ராம ஜென்ம பூமி கோயிலில் வழிபட்டாா். பால ராமருக்கு தீபாராதனை காட்டி பூஜை செய்து வழிபட்டாா்.

அதையடுத்து கோயிலில் 150 கிலோ தங்க முலாம் பூசப்பட்ட ஸ்ரீ ராம யந்திரத்தை பிரதிஷ்டை செய்து சிறப்பு பூஜைகள் செய்தாா். நிகழ்ச்சியில் ஆளுநா் ஆனந்திபென் படேல், முதல்வா் யோகி ஆதித்யநாத், ஆன்மிகத் தலைவா் மாதா அமிா்தானந்தமயி உள்ளிட்டோா் கலந்து கொண்டனா்.

இந்த ஸ்ரீராம யந்திரம், காஞ்சி சங்கராசாா்யா் விஜயேந்திர சரஸ்வதி சுவாமிகளின் வழிகாட்டுதலின்படி உருவாக்கப்பட்டது. இந்த யந்திரம் உருவாக்கப்பட்ட பின்னா் திருப்பதியில் வைக்கப்பட்டு 2 ஆண்டுகளாக சிறப்பு பூஜை நடத்தப்பட்டது. இதையடுத்து அயோத்தி கோயிலுக்கு கொண்டு வரப்பட்டு, இரண்டாவது தளத்தில் அபிஜித் முகூா்த்தத்தின்போது நிறுவப்பட்டது.

இதுகுறித்து குடியரசுத் தலைவா் மாளிகையின் எக்ஸ் பக்கத்தில் வெளியிடப்பட்ட பதிவில், ‘நாட்டு மக்கள் அனைவரின் மகிழ்ச்சிக்காகவும், அபிவிருத்திக்காகவும் அயோத்தி ராமா் கோயிலில் திரெளபதி முா்மு வழிபாடு நடத்தினாா். ஸ்ரீ ராமருக்கு ஆரத்தியும் நடத்தினாா்’ எனத் தெரிவிக்கப்பட்டுள்ளது.

இதையடுத்து அங்கு நடைபெற்ற நிகழ்ச்சியில் கலந்து கொண்டு திரெளபதி முா்மு உரையாற்றினாா். அப்போது அவா் உரையாற்றியதாவது:

இந்திய வரலாற்றில் அயோத்தியில் ராமருக்கு கோயில் கட்டுவிக்கப்பட்டு திறக்கப்பட்டது பொற்கால நிகழ்வாகும். அயோத்தி நகரமானது, இறைவன் ராமருக்கு சொா்க்கத்தை விட அதிகம் பிடித்த இடமாகும். இதை துளசிதாசரின் ராம் சரித் மானஸ் புனித நூல் நமக்குத் தெரிவிக்கிறது. ‘அனைவருக்கும் பிடித்த இடம் வைகுண்டம்; ஆனால் எனக்குப் பிடித்த இடம் அயோத்தி’ என்று பகவான் ராமா் சீதாதேவியிடம் கூறியதை அப்புனித நூல் தெரிவிக்கிறது.

விஷ்ணுவின் அவதாரமான ராமா், அயோத்தியில்தான் பிறந்தாா். அப்படிப்பட்ட புண்ணிய இடத்துக்கு வந்தது எனக்கு கிடைத்த மிகப்பெரிய பாக்கியமாகக் கருதுகிறேன். ராம பக்தா்கள் அனைவருக்கும், அயோத்தி மிகவும் பிடித்த இடமாகும். ராமா் முன் வணங்குவதும், நமது பாரத மாதாவை வணங்குவதும் ஒன்றுதான். ராமரின் அருளால் நமது இந்தியா, 2047-ஆம் ஆண்டுக்குள் அல்லது அதற்கு முன்னரே, அனைவரையும் உள்ளடக்கிய சமூகமாகவும், வளா்ந்த நாடாகவும் மாறும்.

உலகம் முழுவதும் இருந்து கோடிக்கணக்கான பக்தா்கள், அயோத்தி வந்து ராமரை வழிபட்டு வருவது மிகவும் மகிழ்ச்சியளிக்கிறது. நமது நாட்டின் மிகப்பெரிய ஆன்மிக சுற்றுலாத் தலமாக அயோத்தி மாறியுள்ளது. ராமா் கோயில் திறப்பின்போது பிரதமா் மோடிக்கு நான் கடிதம் எழுதியிருந்தேன். அந்தக் கடிதத்தில், கோயில் திறப்பை வரலாற்று சிறப்புமிக்க நிகழ்வு என குறிப்பிட்டிருந்தேன் என்றாா்.

குடியரசுத் தலைவரின் வருகையையொட்டி, அயோத்தியில் பலத்த பாதுகாப்பு ஏற்பாடுகள் செய்யப்பட்டிருந்தன. அயோத்தி கோயில் பகுதி மற்றும் அயோத்தியின் முக்கிய பகுதியில் 7,000 போலீசாா் பாதுகாப்புப் பணியில் ஈடுபடுத்தப்பட்டிருந்தனா்.