மும்பை: மும்பையில் இன்று வியாழக்கிழமை (செப்.19) கனமழை பெய்யும் என எச்சரிக்கை விடுத்துள்ள இந்திய வானிலை மையம், ரெட் அலர்ட் எச்சரிக்கையை அடுத்து பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது.

மஹாராஷ்டிர மாநிலம் மும்பையில், நேற்று இரவு முதல் பலத்த மழை பெய்து வருகிறது. மும்பை புறநகர் பகுதி, நவி மும்பை, தானே மற்றும் மும்பையின் வடக்கு பகுதிகளில் இடி, மின்னலுடன் கன மழை பெய்து வருகிறது. மும்பையின் தெற்கு பகுதிகளில் இரவு 10.30 மணி முதல் கன மழை பெய்து வருகிறது. 

மும்பை புறநகர் பகுதிகளில் காலை 8.30 மணி முதல், இரவு 10.30 மணி வரை 54 மி.மீ மழை பதிவாகி உள்ளது. தெற்கு மும்பையில் 2.2 மி.மீ மழை பதிவாகி உள்ளது. 

இந்நிலையில், மும்பை மற்றும் ராய்காட்டில் இன்று கனமழை பெய்யக் கூடும் என்றும், தானே மற்றும் பால்கர் மாவட்டங்களில் அடுத்த 4 மணி நேரத்தில் கனமழை பெய்யக் கூடும் என எச்சரித்துள்ள இந்திய வானிலை ஆய்வு மையம், 'ரெட் அலர்ட்' விடுத்துள்ளது.

மேலும் மும்பையில் பொதுவாக வானம் மேகமூட்டமாகவும், மிதமான மழையும் பெய்யக்கூடும். நகரம் மற்றும் புறநகர்ப்பகுதிகளில் பலத்த மழை பெய்யக்கூடும் என தெரிவிக்கப்பட்டுள்ளது. 

வானிலை ஆய்வு மையத்தின் 'ரெட் அலர்ட்' எச்சரிக்கையா அடுத்து மும்பை, தானே மற்றும். பால்கர், கோன்கான் பகுதிகளிலுள்ள அனைத்து பள்ளி, கல்லூரிகளுக்கு இன்று புதன்கிழமை (செப்.19) விடுமுறை அறிவித்து மஹாராஷ்டிர மாநில பள்ளி, கல்வித்துறை அமைச்சர் ஆஷிஸ் செலார் உத்தரவிட்டுள்ளார்.