இன்னும் ஆறு நாள் மீதமிருக்க, ரியோ ஒலிம்பிக்ஸை விடவும் அதிக தங்கம் வாங்கியுள்ள சீனா

ரியோ ஒலிம்பிக் போட்டியில் சீன அணி 26 தங்கம் வென்று பதக்கப் பட்டியலில் 3-ம் இடம் பிடித்தது. இந்தமுறை டோக்கியோவில் தங்க வேட்டை நடத்திக்கொண்டிருக்கிறார்கள் சீன வீரர்கள். 

இதையும் படிக்க |  ஒலிம்பிக்ஸ் வெற்றிக்காக சாய்னா நெவால் வாழ்த்தினாரா?: பி.வி. சிந்து பதில்

டோக்கியோ ஒலிம்பிக்ஸ் ஜூலை 23 முதல் ஆகஸ்ட் 8 வரை நடைபெறுகிறது. அதிக தங்கங்கள், அதிகப் பதக்கங்களைப் பெறுவதில் வழக்கமாக அமெரிக்கா, சீனா இங்கிலாந்து ஆகிய நாடுகள் இடையே அதிகப் போட்டி ஏற்படும். 2012, 2016 ஆகிய இரு ஒலிம்பிக்ஸிலும் தலா 46 தங்கப் பதக்கங்களுடன் அமெரிக்கா முதலிடம் பிடித்தது. எனினும் 2008 பீஜிங் ஒலிம்பிக்ஸில் 48 தங்கங்களுடன் சீனா முதலிடம் பிடித்தது. 

டோக்கியோ ஒலிம்பிக்ஸில் சீன வீரர்கள் அசத்திக்கொண்டிருக்கிறார்கள். நேற்று மட்டும் ஒரே நாளில் சீனாவுக்கு 5 தங்கம் கிடைத்தது. இதனால் பதக்கப் பட்டியலில் அமெரிக்காவை விடவும் 7 தங்கம் அதிகம் பெற்று (இன்று மதியம் 12 மணி நிலவரப்படி) முதலிடத்தில் உள்ளது சீனா. 

இதையும் படிக்க | தங்கத்தை பகிா்ந்த நண்பா்கள்

இதுவரை 29 தங்கத்தை வென்றுள்ளது சீனா. ஒலிம்பிக் போட்டி முடிய இன்னும் ஆறு நாள்கள் மீதமிருக்கும் நிலையில் அதற்குள் ரியோ ஒலிம்பிக்ஸில் பெற்றதை விடவும் அதிக தங்கம் வென்றுள்ளது. அடுத்த ஆறு நாள்களில் இன்னும் அதிக தங்கத்தை சீன வீரர்கள் வெல்வார்கள் என எதிர்பார்க்கப்படுகிறது. 2008 பீஜிங் ஒலிம்பிக் போட்டியில் அதிகபட்சமாக 48 தங்கங்களை வென்றது சீனா. அந்தச் சாதனையை டோக்கியோவில் சீன வீரர்கள் முறியடிப்பார்களா என்பது இனிமேல் தான் தெரியும்.