வருகிற ஞாயிறு அன்று நடைபெறவுள்ள டி20 போட்டியில் இந்தியா - மேற்கிந்தியத் தீவுகள் அணிகள் மோதுகின்றன. இதற்கான மே.இ. அணி அறிவிக்கப்பட்டுள்ளது.

இதில் கிறிஸ் கெயில் இடம்பெற்றுள்ளார். இவர் மே.இ. அணிக்காகக் கடைசியாகக் கடந்த வருடம் நடைபெற்ற டி20 உலகக்கோப்பைப் போட்டியில் விளையாடினார்.

கார்லோஸ் பிராத்வெயிட் கேப்டனாக உள்ள இந்த அணியில் ஒருநாள் கேப்டனான ஹோல்டருக்கு ஓய்வளிக்கப்பட்டுள்ளது. சிமன்ஸ் அணியிலிருந்து நீக்கப்பட்டுள்ளார்.

டி20 அணியில் கெய்ல் இடம்பெற்றுள்ளதால் ஞாயிறு அன்று நடைபெறும் போட்டியில் சிக்ஸர்கள் பறக்கும் என்று ரசிகர்கள் ஆர்வமாக உள்ளார்கள். கெய்ல் விளையாடுவதால் அந்தப் போட்டிக்குக் கூடுதல் எதிர்பார்ப்பு ஏற்பட்டுள்ளது. 

கிங்ஸ்டனில் நடைபெறும் டி20 போட்டி, இந்திய நேரம் இரவு 9 மணிக்குத் தொடங்கவுள்ளது. இந்தியா - மே.இ. அணிகள் மோதும் 5-வது மற்றும் கடைசி ஒருநாள் போட்டி வியாழன் அன்று கிங்ஸ்டனில் நடைபெறவுள்ளது.