இங்கிலாந்து லயன்ஸ் அணிக்கு எதிரான அதிகாரபூர்வமற்ற டெஸ்ட் தொடரை இந்திய ஏ அணி வென்றுள்ளது.

மைசூரில் நடைபெற்ற அதிகாரபூர்வமற்ற டெஸ்ட் ஆட்டத்தில் இந்தியா ஏ - இங்கிலாந்து லயன்ஸ் அணிகள் மோதின. முதல் நாளன்று இந்திய ஏ அணி, 3 விக்கெட் இழப்புக்கு 282 ரன்கள் எடுத்திருந்தது. இந்நிலையில், இந்திய ஏ அணி, 114.4 ஓவர்களில் 392 ரன்களுக்கு அனைத்து விக்கெட்டுகளையும் இழந்தது. முன்வரிசைகள் வீரர்கள் தவிர நடுவரிசை, பின்வரிசை வீரர்களில் விக்கெட் கீப்பர் பரத்தைத் தவிர இதர வீரர்கள் சொற்ப ரன்களில் ஆட்டமிழந்தார்கள். பரத் 46 ரன்கள் எடுத்தார். இங்கிலாந்தின் சேப்பல் 4 விக்கெட்டுகளை வீழ்த்தினார்.

இதன்பிறகு முதல் இன்னிங்ஸைத் தொடர்ந்த இங்கிலாந்து லயன்ஸ் அணி, 48.4 ஓவர்களில் 140 ரன்களுக்கு அனைத்து விக்கெட்டுகளையும் இழந்தது. போப் மட்டும் அதிகபட்சமாக 25 ரன்கள் எடுத்தார். இந்தியத் தரப்பில் சைனி, நதீம் தலா 3 விகெட்டுகளும் ஆரோன், ஜலஜ் சக்ஸேனா தலா 2 விக்கெட்டுகளையும் எடுத்தார்கள். 

ஃபாலோ ஆன் ஆன இங்கிலாந்து லயன்ஸ் அணி 2-ம் நாளின் முடிவில் தனது 2-வது இன்னிங்ஸில்விக்கெட் இழப்பின்றி 24 ரன்கள் எடுத்தது. அந்த அணி 10 விக்கெட்டுகள் மீதமுள்ள நிலையில் 228 ரன்கள் பின்தங்கியிருந்தது. 

இந்நிலையில் இங்கிலாந்து லயன்ஸ் அணி இன்று 2-வது இன்னிங்ஸில் 53.3 ஓவர்களில் 180 ரன்களுக்கு அனைத்து விக்கெட்டுகளையும் இழந்தது. இதனால் இந்திய ஏ அணி ஒரு இன்னிங்ஸ் 68 ரன்கள் வித்தியாசத்தில் வெற்றி பெற்றது. இந்திய ஏ தரப்பில் மார்கண்டே 5 விக்கெட்டுகளும் ஜலஜ் சக்ஸேனா 2 விக்கெட்டுகளும் வீழ்த்தி அசத்தினார்கள். 

2 ஆட்டங்கள் கொண்ட தொடரில் இந்திய ஏ அணி 1-0 என வென்றுள்ளது.