நியூஸிலாந்துக்கு எதிரான 3-வது டெஸ்ட் ஆட்டத்தில் தனது முதல் ரன்னை எடுக்க முக்கால் மணி நேரம் எடுத்துக்கொண்டார் பிரபல பேட்ஸ்மேன் ஸ்டீவ் ஸ்மித்.

இந்த டெஸ்ட் தொடரில் நீல் வாக்னர் பந்துவீச்சில் நான்கு முறை ஆட்டமிழந்த ஸ்மித், இந்தமுறை மிகவும் கவனமாக விளையாடினார். இதனால் அவர் தனது முதல் ரன்னை எடுக்க 39 பந்துகள், 46 நிமிடங்கள் ஆயின. இதுபோல முதல் ரன்னுக்காக ஸ்மித் இந்தளவுக்குத் தடுமாறியது இதுவே முதல்முறை. இதற்கு முன்பு, 2014-ல் இந்தியாவுக்கு எதிராக மெல்போர்னில் முதல் ரன்னை எடுக்க 18 பந்துகள் எடுத்துக்கொண்டார் ஸ்மித். 

மிகவும் கஷ்டப்பட்டு முதல் ரன்னை ஸ்மித் எடுத்தபோது ரசிகர்கள் ஆரவாரம் செய்தார்கள். பந்துவீச்சாளர் வாக்னர், ஸ்மித்தின் முதுகில் தட்டிக்கொடுத்தார். ஸ்மித்தும் தன்னுடைய உற்சாகத்தை ரசிகர்களிடம் பகிர்ந்துகொண்டார். பிறகு 182 பந்துகளில் 63 ரன்களில் ஆட்டமிழந்தார் ஸ்மித். 

முதல் நாள் முடிவில் ஆஸ்திரேலிய அணி, 90 ஓவர்களில் 3 விக்கெட் இழப்புக்கு 283 ரன்கள் எடுத்துள்ளது. மார்னஸ் லபூஷேன் 130, வேட் 22 ரன்களுடன் களத்தில் உள்ளார்கள்.